चीन सरकारले अनुदानअन्तर्गत प्रदान गर्ने दुई विमानमध्ये ‘एमए६०’ मोडलको ५६ सिट क्षमताको विमान २० चैतमा चीनको सियानमा आयोजित कार्यक्रममा नेपाली अधिकारीलाई हस्तान्तरण गरेको छ । नेपालले चीन सँग ४ वटा विमान सहुलियतपूर्ण ऋणमा र दुई वटा विमान अनुदानमा प्राप्त गर्ने सम्झौता गत १३ मंसीरमा भएको थियो ।

विमान आगामी १३ वैशाखमा काठमाडौं अवतरण गर्ने बताइएको छ । यसपछि नेपालले ‘वाई १२ ई’ मोडलको १९ सिटे विमान पनि निगमले अनुदानमा प्राप्त गर्दैछ । उक्त विमान असारसम्ममा नेपाल आइपुग्ने छ ।

चीनको सियानमा आयोजित एक समारोहमा नेपाल वायुसेवा निगमका महाप्रवन्धक मदन खरेललाई एभिक कम्पनीका उपाध्यक्ष सुबोले विमान हस्तान्तरण गरेको निगमले जानकारी दिएको छ ।

सन् १९८८ पछि निगमले पहिलो पटक नयाँ विमान प्राप्त गरेको निगमका प्रवक्ता रामहरी शर्माले जानकारी दिए ।

हाल निगमले एउटा ट्विनअटरमार्फत आन्तरिक उडान गरिरहेको छ ।

सहुलियत ऋणमा ल्याइने ४ ओटा जहाजको ५ वर्षसम्म ब्याज तथा ऋण तिर्नु नपर्ने र छैटौ वर्षदेखि ३० वर्षसम्म किस्ता चुक्ता गर्नुपर्ने गरी औपचारिक सहमति भएको थियो ।

असोजमा थप एक विमान भित्र्याउने तयारीमा रहेको निगमले बाँकी ३ ओटा विमान भने कात्तिकसम्म प्राप्त भइसक्ने बताएको छ ।

बुझबुझारथसम्बन्धी कागजातमा नेपालका तर्फबाट महाप्रबन्धक खरेल र एभिकका उपाध्यक्ष झुले हस्ताक्षर गरेका छन् ।
अहिले चिनियाँ जहाज उडाउन प्राविधिक तालिमका लागि पाइलट, कोपाइलट र इन्जिनियरसहित १३ सदस्य चीनमै छन् ।

विमान शुरुमा केही महिना नेपालकै शहरी क्षेत्रमा र त्यसपछि नेपालसँग सीमा जोडिएका भारतका सहरहरूमा उडाउने योजना निगमको छ ।

प्रतिकृया दिनुहोस