आगो लगाएर हत्या गरिएको आशंका
सप्तरीको लोहजारा गाविसमा एक महिलाको आगोले जलेर मृत्यु भएको छ । माइतीपक्षले उनको हत्या भएको दाबी गरेका छन् ।

लोहजारा–४ बस्ने मिश्रीलाल साहकी कान्छी श्रीमतिको आगोले जलेर ज्यान गएको हो । २२, चैत राति घरमा सुतिरहेकी राजकुमारी साहको शरीरमा आगो लागेको थियो । उनलाई उपचारका लागि लग्दै गर्दा ज्यान गएको इलाका प्रहरी कार्यालय कंचनपुरका प्रहरी निरीक्षक दिपक कार्कीले जानकारी दिए ।

स्थानीयका अनुसार मिश्रीलालका तीन जना पत्नीमध्ये राजकुमारी कान्छी थिइन् । ३५ बर्षीया राजकुमारीको पति, सौताहरु र परिवारका अन्य सदस्यहरुसँग बारम्बार झगडा हुँदै आएको थियो ।

प्रिवारका सदस्यहरुले नै उनको शरीरमा आगो लगाएर हत्या गरेको हुन सक्ने स्थानीयले बताएका छन् । यद्यपी प्रहरी निरीक्षक कार्कीले घटनाको अनुसन्धान भइरहेको बताए ।

बोक्सीको आरोपमा कुटपिट

नन्द र भाउजुबीच भइरहेको झगडा मिलाउन गएकी एक महिलालाई बोक्सीको आरोप लगाउँदै कुटपिट गरिएको छ ।

बोक्सीको आरोप लगाई भएको कुटपिटबाट बनैनियाँ गाविस ७ की बानो मण्डल घाइते भएकी छिन् । ४० बर्षीया बानोको शरीरमा कुटपिटले निलडाम परेको छ ।
बानोकी छोरी संगीता तथा बानोकै जेठाजु हरेरामकी बुहारी रञ्जनाबीच भइरहेको झगडा छुट्टयाउन गएकी बानोलाई रञ्जनासहितकाले बोक्सी भन्दै निर्घात कुटपिट गरेका छन् ।

एक साताअघि भएको यो घटनाबारे प्रहरीलाई जानकारी गराउँदा समेत सुनुवाई नभएको पीडितको भनाई छ ।

स्वास्थ्यकर्मी महिलालाई कुटपिट गर्दै घरनिकाला

घर तथा खेतबारीको रेखदेख गर्न राखिएका कामदारसँगै अनैतिक सम्बन्ध राखेको आरोप लगाउँदै सप्तरीकी एक स्वास्थ्यकर्मी महिलालाई स्थानीयहरुले कुटपिट गर्दै घर निकाला गरेका छन् ।

जिल्लाको धर्मपुर– ८ बस्ने मेनुका दाहाललाई स्थानीयहरुले १८ चैतमा कुटपिट गर्दै घरबाट निकालेर उनको घरमा ताला लगाइदिएका छन् ।

पिप्रा पूर्व गाविसमा अनमी पदमा कार्यरत उनी स्वास्थ्य चौकीतर्फ जाने तयारी गरिरहँदा स्थानीय एक दर्जन व्यक्तिहरुले निर्घात कुटपिट गर्दै घर निकाला गरेको उनले बताएकी छिन् । मेनुकाका पति रोहिणी प्रसादको २०६८ साल चैतमा मृत्यु भइसकेको छ ।

घर तथा खेतबारी रेखदेखका लागि सोही गाउँका ५७ बर्षीय फणिन्द्र पोखरेललाई कामदारका रुपमा राखिएको र स्थानीय केहि व्यक्तिहरुले पोखरेलसँगै सल्किएकोे आरोप लगाउँदै आफ्नो चरित्र हत्या गर्न खोजेको मेनुकाको भनाई छ ।

उनीहरु मिलेर कामदार फणिन्द्रसँग सिन्दुर पोते गर्न दबाब दिएको मेनुकाले बताइन् ।

श्रवणकुमार देव, सप्तरी

प्रतिकृया दिनुहोस