तस्वीर: श्याम गुप्ता

१० वैशाखमा बाराको सिसहनिया– ४ स्थित सुमेश्वरनाथ बाबाको मन्दिर उद्घाटन गर्न पुगेका पूर्व राजा ज्ञानेन्द्र शाहले सञ्चारकर्मीहरुलाई प्रतिक्रिया दिंदै जनताले आफूप्रति निकै सम्मान देखाएको र अपेक्षा पनि राखेको तर, आफूले भने जनताका लागि केही गर्न नसकेको बताएका छन् ।

२८ चैतमा बाराको सिमरा आइपुगेका पूर्वराजा ज्ञानेन्द्र शाह यसक्षेत्रमा भेटघाट र पूजाआजामा व्यस्त छन् । सिमरास्थित आफन्त प्रभु शाहको निवासमा बस्दै आएका शाहले १० वैशाखमा सिसहनिया–४ मा निर्मित सुमेश्वरनाथ मन्दिरको पूजाअर्चना गरी उद्घाटन गरे ।

पूर्व राजा सहभागी हुने कार्यक्रममा उनका समर्थकहरु फूलमाला सहित ‘हाम्रो राजा हाम्रो देश प्राण भन्दा प्यारो छ,’ ‘राजा आउ देश बचाउ’ जस्ता नारा लगाउँदै स्वागतका लागि उपस्थित हुने गरेका छन् ।

भारतमा हिन्दूवादी नेता नरेन्द्र मोदी प्रधानमन्त्री भएपछि नेपाललाई पनि हिन्दु राष्ट्र बनाउन सहयोग हुन्छ वा हुँदैन भन्ने सञ्चारकर्मीको प्रश्नको जवाफ दिंदै उनले त्यसबारेमा आफूलाई केही थाहा नभएको प्रतिक्रिया दिए ।

गणतन्त्र, हिन्दूराष्ट्र लगायतका विषयमा सञ्चारकर्मीले राखेको जिज्ञासामा शाहले आफूलाई थाहा नभएको भन्दै पञ्छिएका थिए ।
श्याम गुप्ता, बारा

प्रतिकृया दिनुहोस