तुफान न्यौपाने, नेपालगञ्ज

एक परिवारबाट एक सदस्य हुने महासंघको विधान विपरित जिल्ला अध्यक्ष र सदस्यका परिवारका दुई/दुई जना महासंघमा प्रतिनिधित्व गरिरहेको खुलेको हो । महासंघ जिल्ला अध्यक्ष द्रोपति ओली रामजानकी सामुदायिक वन लक्ष्मणपुरबाट प्रतिनिधित्व गर्छिन् भने उनका पति युवक ओली ज्योति सामुदायिक वन कोहलपुरबाट प्रतिनिधित्व गर्दै लखना रेञ्जपोष्ट स्तरीय महासंघको अध्यक्ष बनेका छन् । उनी काठका ठेकेदार समेत हुन् ।

सामुदायिक वन उपभोक्ता महासंघ बाँकेकी अध्यक्ष द्रोपति ओली । तस्वीरः तुफान न्यौपाने

कोहलपुर निवासी महासंघ अध्यक्ष ओली राजनीति गर्नकै लागि ४० किलोमिटर टाढाको रामजानकी सामुदायिक वन लक्ष्मणपुरबाट प्रतिनिधि बनेर आएकी हुन् । उनी उक्त वनकी उपभोक्ता पनि होइनन् । फर्जी उपभोक्ता बनेर उनले महासंघको नेतृत्व हत्याएकी थिइन् ।

त्यस्तै, महासंघका जिल्ला सदस्य डिल्ली रावत पनि पत्नीसँगै सामुदायिक वनका पदाधिकारी हुन् । डिल्लीले भवगती सामुदायिक वन फत्तेपुरबाट प्रतिनिधित्व गर्छन् भने महासंघको आसन्न जिल्ला अधिवेशनलाई लक्षित गर्दै उनले पत्नी खगिसरी रावतलाई बवनपुरुवा सामुदायिक वन कम्दीबाट प्रतिनिधि बनाएका छन् । खगिसरालाई रेञ्जपोष्ट स्तरीय महासंघले पनि प्रतिनिधि चुनिसकेको छ ।

सामुदायिक वन उपभोक्ता महासंघ बाँकेको अधिवेशन यही २९ वैशाखमा हुँदैछ । उक्त अधिवेशनलाई लक्षित गरेर राजनीति गर्नकै लागि दोहोरो उपभोक्ता बन्ने गरेको महासंघ सम्बद्ध स्रोत बताउँछ ।

अध्यक्ष ओलीले वन ऐन संशोधन भई नसकेकाले एकै घरका व्यक्ति पनि समितिमा बस्न पाइने दाबी गरेकी छन् । तर, सहायक वन अधिकृत गणेश खड्काले एकै परिवारका व्यक्ति उपभोक्ता समूहका सदस्य बन्न नपाइने बताए । “कुनै हालतमा एक घरका दुई जना सदस्य बन्न पाइँदैन,” उनले भने,“बाँकेमा त्यस्तो भएको रहेछ भने बुझेर कारबाहीको प्रक्रिया अगाडि बढाउँछौ ।”

प्रतिकृया दिनुहोस