सौंदर्य प्रसाधनको विज्ञापनदेखि मिस इंडिया प्रतियोगिताकी सहभागी र भारतीय टेलीविजनका दर्शककी प्रिय ‘बुहारी’ हुँदै मानव संसाधन मन्त्री बनेकी ३८ वर्षीया स्मृति ईरानीको जीवन प्रसिद्धि र सफलताको कथा बनेको छ ।

दिल्लीबाट १२ कक्षा पास गरेर एक वर्ष कलेज पढेकी स्मृति इरानी मोडलिंग क्षेत्रमा काम गर्न मुम्बइ पुगेकी थिइन् । आफ्ना बाबुबाट दुई लाख रुपैयाँ सापटी लिएर ‘मिस इण्डिया’ प्रतियोगितामा भाग लिएकी उनी टप फाइभसम्म पुगेपछि केही विज्ञापनहरुमा मोडलिङ समेत गरिन् ।

तर सानोतिनो मोडलिङले मात्रै मुम्बई बसाइको खर्च धान्न नसकेपछि उनले म्यकडोनाल्डमा वेटरको काम गरिन् । यसैबीच उनले एकता कपुरको सिरियल ‘क्योंकी सास भी कभी बहू थी’ मा मुख्य भूमिकामा काम पाइन् ।

त्यस सिरियलले उनलाई प्रसिद्धिको नयाँ उचाइँमा पुर्‍यायो । समयसँगै उनले अभिनय बाहेक लेखनमा पाइला राखिन र टेलिभिजन सिरियलमा निर्माताको भूमिका निर्वाह गरिन् ।

सन् २००३ मा भारतीय जनता पार्टीमा संलग्न भएकी उनले २००४ मा दिल्लीको चाँदनी चोक सिटबाट टिकट पाए पनि कांग्रेसका कपिल सिब्बलसँग हार ब्यहोरेकी थिइन् ।

त्यसपछि उनलाई भारतीय जनता पार्टीको महिला मोर्चाको राष्ट्रिय अध्यक्षको पद प्राप्त भयो । भर्खरै सम्पन्न आम निर्वाचनमा कांग्रेसका राहुल गान्धीसँग अमेठी क्षेत्रबाट चुनाव हारेकी इरानी राज्य सभामा भाजपाका तर्फबाट सांसद छिन् ।
दिल्लीमै हुर्के बढेकी स्मृती टेलिभिजनबाट चर्चित भएपछि नै उनको क्षमताको कदर गर्दै भाजपाले उनलाई पार्टीमा मुख्य जिम्मेवारी दिएको हो ।

अभिनय क्षेत्रका अरु धेरै पार्टीमा भए पनि स्मृतिको कार्यकुशलता, जिम्मेवारी बहन गर्ने क्षमता र संगठन निर्माणमा उनको भूमिकाका कारण उनले मन्त्री पद पाएको भारतीय सञ्चारमाध्यमहरुले उल्लेख गरेका छन् ।
आफ्ना बाल्यकालका साथी जुबिन ईरानीसँग विवाह गरेकी स्मृतिका दुई छोरा छन् ।

स्मृतिले भर्खरै भारतीय टेलिभिजनलाई दिएको अन्तर्वातामा मध्यमवर्गीय परिवारकी आफूले घर र काम भन्दा ठूलो सपना नदेखेको बताएकी छन् ।

सन् २००४ मा गुजरातमा भएको साम्प्रदायिक दंगापछि मोदीको कटु आलोचना गरेकी उनले भनेकी छन्, ‘मन्त्री भएर देशको सेवा गर्नेछु भन्ने सोचेकी थिइन्, यस्तो मौका दिएकोमा नरेन्द्र मोदीलाई धन्यवाद ।’

एजेन्सीहरु

प्रतिकृया दिनुहोस