लमजुङको बाहुनडाँडा–८ लामपाटाकी १९ वर्षीय आइतकुमारी तामाङको शव १४ जेठ दिउँसो मध्यमस्र्याडदी जलविद्युत आयोजनाको बाँधस्थलमा फेला परेको प्रहरी नायव उपरीक्षक अच्युत पुडासैनीले जानकारी दिए ।

सदरमुकाम बेसीशहरमा डेरा गरी कक्षा ११ मा अध्ययनरत आइतकुमारी गत ७ जेठ देखि बेपत्ता थिइन् । प्रहरीका अनुसार तामाङको कोठामा उनका भित्री वस्त्र र तन्ना रगताम्य भेटिएका थिए । उनको बलत्कारपछि हत्या भएको प्रहरीको अनुमान छ । पोष्टमाटमको रिपोर्ट आएपछि मात्र घटनाको यथार्थ जानकारी हुने प्रहरीले जनाएको छ ।

शव पोष्टमार्टमका लागि जिल्ला सामुदायिक अस्पताल बेसीशहरमा लगिएको छ ।

आइतकुमारीको हत्या बाहुनडाडा ६ ठूलाबेसीका १८ वर्षीय जितबहादुर अधिकारीले गरेको दाबी सहित आमा सेतीमायाले किटानी जाहेरी दिएकी छन् । जीतबहादुर र आइतकुमारी दुवै एउटै विद्यालयबाट एसएलसी गरेपछि बेसीशहरमा एउटै कलेजमा अध्ययन गर्थे । उनीहरुको डेरा पनि एउटै घरमा थियो ।

आइतकुमारी वेपत्ता भएको दिन जेठ ७ दिउ“सो साढे १ बजेसम्म पनि उनीहरु दुवै जना सगै कोठामा रहेको तर, त्यसपछि आफू साथीकोमा गएकाले घटनाका बारे कुनै जानकारी नभएको अधिकारीले बयान दिएका छन् ।

पीडितकी आमा सेतीमायाले छोरीले रुँदै आफूलाई कुनै केटाले जवरजस्ती गरेको टेलिफोनमार्फत जानकारी गराएकाले हत्या गर्ने जीतबहादुर नै भएको दाबी गरेकी छन् । यसअघि पनि जीतबहादुरले जवरजस्ती गर्ने प्रयास गरेको छोरीले गुनासो गरेको सेती मायाले बताइन् ।

घटनामा संलग्न भएको आंशकामा प्रहरीले जीत बहादुर र उनकी हजुरआमा पदमकुमारी महतलाई नियन्त्रणमा लिई अनुसन्धान शुरु गरेको छ ।

पिडितका परिवारजन र स्थानियबासी भने प्रहरीले अनुसन्धानमा ढिलाई गरेको भन्दै तीन दिनदेखि आन्दोलनमा छन् ।

युवराज श्रेष्ठ, लमजुङ

प्रतिकृया दिनुहोस