गत शुक्रबारदेखि मोसुलमा आक्रमण शुरु गरेका चरमपन्थी विद्रोहीहरुले बुधबार शहरलाई पूर्ण नियन्त्रणमा लिएका थिए भने अब उनीहरुले अर्को शहर तिकरितमा कब्जाको प्रयास थालेका छन् । तिकरित पूर्व शासक सद्दाम हुसैनको गृह नगर हो जुन राजधानी वगदादभन्दा भन्दा १५० किलोमिटर उत्तरमा अवस्थित छ ।

इराक़ी प्रधानमन्त्री नूरी अल मलिकीले विद्रोहीलाई साथ दिनेहरुलाई कारवाही गरिने चेतावनी दिएका छन् ।

चरमपन्थी विद्रोहीहरु इस्लामिक स्टेट अफ इराक र लेवेन्ट (आइएसआइएस) सम्बद्ध भएको बीबीसीले जनाएको छ जस्को सम्बन्ध अल कायदासँग रहेको मानिन्छ । पूर्वी सिरिया र पश्चिमी तथा केन्द्रीय इराकका धेरै क्षेत्र यसै संगठनको नियन्त्रणमा छन् ।

मोसुलका सरकारी कर्मचारीहरुले शहरमा अराजक स्थिति रहेको र आफूहरु लुकेर बस्नु परेको बताएको अन्तर्राष्ट्रिय सञ्चारमाध्यमहरुले उल्लेख गरेका छन् ।
शहरका कैयौं प्रहरी कार्यालयमा आगो लागेको छ भने सयौं कैदीहरुलाई कैदमुक्त गरिएका छन् ।

समाचार एजेन्सी एएफपीका अनुसार त्यहाँ रहेको सेनाका जवानहरुले हथियार छोडेका छन्, आफ्नो पोशाक फेरेका छन् र शहरबाट पलायन भएका छन् । इराकी सुरक्षा बल आइएसआइएसका विरुद्ध लड्न असमर्थ भएको सञ्चारमाध्यमहरुले जनाएका छन् ।

समाचार एजेन्सी रोयटर्सका अनुसार आइएसआइएसका केही चरमपन्थीहरुले नजिकको शहरमा पसेर अदालत र प्रहरी कार्यालय जलाएको र कैदीहरुलाई रिहा गरेको जनाएको छ ।

लाखौं इराकी नागरिकहरु छिमेकी कुर्दिस्तानतर्फ लागेका छन् । कुर्दिस्तानका प्रधानमंत्री नचोरविन बारज़ानीले राष्ट्र संघीय शरणार्थी संस्थासँग सहयोगका लागि अपिल गरेका छन् ।

प्रतिकृया दिनुहोस