रुकुम, म्याग्दी र बाग्लुङ जिल्लाको १ हजार ३२५ बर्ग किलोमिटरमा फैलिएको ढोरपाटन शिकार आरक्षमा सम्बन्धित निकायको अनुमतिमा तोकिएको शुल्क तिरेर जंगली जनावर नाउर र झारलको शिकार गर्न पाइन्छ ।

असोजको शुरुवातसम्म वर्षा हुने र हिउँदमा हिउँले ढाकिने ढोरपाटनको उत्तरी सीमामा पुथा, चुरेन र गुर्जा हिमालहरू स्पष्ट देख्न पाइन्छ । यो आरक्ष समुन्द्री सतहबाट २,८५० मिटर देखि ५,५०० मिटर उचाईमा अवस्थित छ।

ढोरपाटन जान पूर्वपश्चिम राजमार्ग अन्तर्गत रुपन्देहीको सालझण्डी बाट अर्घाखाँची, प्यूठानको सौतामारे, गुल्मीको पुर्कोटदह, सिर्सेनी, बाग्लुङको बुर्तिबांगहुँदै पुग्न सकिन्छ । भर्खरै खुृलेको यो सडक ट्रयाकबाट सालझण्डीबाट ढोरपाटन पुग्न १३ घण्टा लाग्छ ।

सालझण्डीबाट ढोरपाटनसम्मको दुरी १८० किलोमिटर मात्रै छ । बाग्लुङको बुर्तिबाङबाट ढोरपाटनका लागि जीपहरु चल्ने गर्छन् । बुर्तिबाङबाट ढोरपाटन पुग्न जीपलाई करिब ३ घण्टा लाग्छ ।

पूर्वाधार विकास हुनसकेमा लुम्बिनी आउने पर्यटकहरुका लागि ढोरपाटन आकर्षक गन्तव्य हुनसक्ने स्थानीय बताउँछन् । लुम्बिनीको तातो गर्मीले निसास्एिका पर्यटकलाई १८० किलोमिटरकै दूरीमा चिसो र रमाइलो ढोरपाटन छ भन्ने प्रचार गर्न सकेमा स्थानीय विकासमा सहयोग पुग्ने र पर्यटकहरुका लागि आकर्षक गन्तव्य बन्नसक्ने सम्भावना छ ।

अहिले ढोरपाटनमा बस्नका लागि केही साना होटल, गेस्टहाउस भए पनि सुविधासम्पन्न होटेल रेष्टूराँहरु छैनन् ।

जेठको अन्तिम साता पनि बाक्लो सिरक ओढेर सुत्नुपर्ने ढोरपाटन क्षेत्रमा चिसो र स्वच्छ पानीका मुहानहरु थुप्रै छन्, जुन पर्यटकका लागि पनि आकर्षणको विषय हुनसक्छ ।

ढोरपाटन शिकार आरक्षमा गोब्रे सल्ला, सल्ला, भोजपत्र, लाली गुराँस, ठिँग्रे सल्ला, सिंदूर, धुपी तथा देबदारु लगायतका वनस्पतिहरू पाइन्छन्।
१ सय ८५ थरीका दुर्लभ वनस्पति भएको यसक्षेत्रमा उच्च पहाडी सिमसार क्षेत्र, ३२ थरीका स्तनधारी वन्यजन्तु, १ सय ३० प्रजातीका चराचुरुङ्गी नाउर, झारल, हिउँ चितुवा, चित्तल, थारल, घोरल, भालु, बँदेल, लंगुर, रेड पाण्डा, कस्तुरी मृग लगायतका जंगली जनावर र डाँफे, मुनाल लगायतका पंक्षीहरू पाइन्छन् ।
ढोरपाटन घुम्नका लागि गर्मी महिना नै उपयुक्त हुन्छ ।

ढोरपाटनमा जस्तो घोड सवारी र प्राकृतिक दृश्यावलोकन रमाइलो अन्यत्रभन्दा नितान्त फरक हुन्छ ।

यो गर्मीका बेला जाने हैन त चिसो ढोरपाटन घुम्न ?

प्रेमनारायण आचार्य, अर्घाखाँची

प्रतिकृया दिनुहोस