सभामुख सुवास नेम्वांगसँग भेट वार्ता गर्दै नेतृ सू ची । तस्वीर: रासस

व्यवस्थापिका–संसद्मा ३१ जेठमा आयोजित प्रवचन कार्यक्रमलाई सम्बोधन गर्दै म्यानमारकी प्रजातन्त्रवादी नेतृआङसान सू चीले म्यानमारमा सेनाको प्रत्यक्ष नियन्त्रणमा रहेको लोकतन्त्र अझै पनि वास्तविक जनताको पक्षमा हुन नसकेको र केवल देखाउनका लागि मात्रै रहको बताएकी छन् ।

लामो समय सैनिक शासन रहेका कारण म्यानमारमा प्रजातान्त्रिक प्रक्रिया अगाडि बढ्न नसकेको र राजनीतिक रुपमा जनताले अधिकार प्राप्त गर्न नसकेको उल्लेख गर्दै नेतृ सूचीले शान्तिपूर्ण आन्दोलनले नै सबै खालका निरङ्कुशता अन्त्य गर्ने विश्वास व्यक्त गरिन् ।

आफूहरुले निरन्तर शान्तिपूर्ण आन्दोलनलाई अगाडि बढाइरहेको भन्दै उनले निकट भविष्यमा सफलता प्राप्त गर्ने र जनताले लोकतान्त्रिक शासन व्यवस्थाको अनुभव गर्ने बताइन् । शान्तिपूर्ण आन्दोलनले नै म्यान्मालाई क्रमशः प्रजातान्त्रिक दिशामा अगाडि बढाउँदै लगेको र सन् २०१५ मा हुने निर्वाचनले सो प्रक्रियालाई नयाँ दिशामा लैजाने उनको भनाई छ ।

नेपालको लोकतन्त्र र प्रजातान्त्रिक आन्दोलन विश्वका लागि अनुकरणीय भएको बताउँदै सू चीले नेपालमा लोकतान्त्रिक आन्दोलन विभिन्न आरोहअवरोह पार गर्दै अगाडि बढेको, राजनीतिक दल सहमति, सम्झौता र सहकार्यका साथ लागिपरेको र सो आन्दोलनले प्रजातन्त्रलाई क्रमशः संस्थागत बनाउँदै लगेको भन्दै खुशी व्यक्त गरिन् ।

नेपालको सेनाले प्रजातान्त्रिक प्रक्रियालाई आत्मसात् गरेको, राजनीतिक परिवर्तनलाई स्वीकार गरेको तर म्यान्मारमा भने त्यस खालको अवस्था नरहेको बताउँदै उनले भनिन्, ‘‘नेपालको राजनीतिक परिवर्तन र सहकार्यको संस्कृति विश्व समुदायका लागि अनुकरणीय रहेको छ, हामी सबैले यसबाट पाठ सिक्न जरुरी छ ।’’

आफ्नो दल नेसनल लिग फर डेमोक्रेसीले निरन्तर लोकतन्त्र र शान्तिका पक्षमा सङ्घर्षरत रहेको बताउँदै उनले प्रजातान्त्रिक प्रक्रिया निरन्तर रुपमा अगाडि बढ्ने गतिशील यात्रा भएको बताइन् ।

नेतृ सू चीले नेपालमा जारी संविधान निर्माण प्रक्रियाले सार्थक निष्कर्ष पाउने र नेपाली जनताको सार्थक प्रगति हुने विश्वास व्यक्त गरेकी थिइन् ।

सभामुख सुवासचन्द्र नेम्वाङले स्वागत मन्तव्य राख्दै नेतृ सू चीलाई स्वागत गर्न पाउँदा व्यवस्थापिका–संसद् र संविधानसभा अत्यन्तै आभारी रहेको बताए ।

नेपाल र म्यान्माको सम्बन्ध मैत्रीपूर्ण रहेको उल्लेख गर्दै उनले मानवाधिकार र शान्तिका पक्षमा सू चीको निरन्तरको प्रयास अनुकरणीय रहेको पनि बताएका थिए ।

प्रतिकृया दिनुहोस