तुफान न्यौपाने, नेपालगञ्ज

वन अतिक्रमणकारीको आक्रमणबाट तीन कर्मचारी घाइते भएका छन् । फत्तेपुर–८ मा सिद्धबाबा सामुदायिक वनमा भएको अतिक्रमण हटाउन गएका वन कर्मचारीलाई अतिक्रमणकारीले १२ असारमा आक्रमण गरेका हुन् ।

घरेलु हतियारले आक्रमण गर्दा जमदार भवेन्द्र गिरी र देवेन्द्र योगी तथा हवल्दार इन्द्रबहादुर घर्ती घाइते भएको सहायक वन अधिकृत गणेश खड्काले जानकारी दिए । घाइतेमध्ये घर्तीको टाउको फुटेको छ भने योगीको हात र घुँडामा तथा गिरीको डाढमा चोट लागेको छ । घाइते सबैको नेपालगञ्ज नर्सिङ होममा उपचार भइरहेको छ ।

फत्तेपुर–८ का राजकुमार बुढा, भुवनेश्वर चौधरी, श्री थारु, चन्द्रु थारु, तेजबहादुर थारु, जंगली थारु, बुद्धिराम चलाउने, पीताम्बर थारु, हरिप्रसाद थारु, जागु थारु र घुमिलाल थारुले वन क्षेत्र अतिक्रमण गरेका छन् । यीमध्ये भुवनेश्वर एम्बुलेन्स चालक हुन् ।

वन कर्मचारीबाट राइफल खोस्न थालेपछि तनावपूर्ण भएको स्थितिलाई नियन्त्रणमा लिन चार राउण्ड हवाई फायर गरिएको सहायक वन अधिकृत खड्काले बताए । सिद्धबाबा सामुदायिक वनको करीब ७ हेक्टर जमिन अतिक्रमण भएको छ ।

वन क्षेत्र अतिक्रमण गरी खनजोत गरेर मकै छर्ने र धान लगाउने तयारी गरेका बेला वनले अतिक्रमणकारीलाई हटाउन खोजेको थियो । अतिक्रमण रोक्न सामुदायिक वनका उपभोक्ताले प्रति घरधुरी २०० रुपैयाँ उठाएर तारबार गर्ने प्रयास थालेको उपभोक्ता समिति अध्यक्ष मोति बुढाथोकीले जानकारी दिए

प्रतिकृया दिनुहोस