बारामा अवैध काठ चोरी गरिरहेका दुई जना असई र एक हवल्दारसहित ६ प्रहरीलाई गाउँलेले नियन्त्रणमा लिएका हुन् । बाराको गढीमाई नगरपालिका–३ स्थित प्रहरी पोष्ट रामवन र स्थानीयबासिन्दाले ४ साउन राति काठ तस्करी गरिरहेको अवस्थामा उनीहरुलाई नियन्त्रणमा लिएका हुन् ।

रामवनमा डकैतीका घटनाहरु बढ्न थालेपछि रात्री गस्ती गरिरहेका प्रहरी पोष्ट रामवनका इन्चार्ज प्रहरी हवल्दार नारायणबहादुर भण्डारी नेतृत्वको टोलीसहित स्थानीयबासिन्दाले काठ तस्करी गरिरहेको अवस्थामा ट्रयाक्टर, इलाका प्रहरी कार्यालय सिमराको प्रहरी भ्यान र तस्करीमा संलग्न प्रहरीलाई नियन्त्रणमा लिएका जनाएका छन् ।

प्रहरीले नै तस्करी गरेको काठ नियन्त्रणमा लिँदै स्थानीयबासिन्दाल । तस्वीरः श्याम गुप्ता

गाउँलेले इलाका प्रहरी कार्यालय सिमरामा कार्यरत असईहरु सगिर अहमद र धर्मेन्द्र गिरी, हवल्दार चेतबहादुर थापा, प्रहरी जवानहरु संदिप कोईराला, आकाश गुरुङ र भीम रोकाया छन् । उनीहरुलाई नियन्त्रणमा लिएर ५ साउन बिहान पर्सा बन्यजन्तु आरक्षमा बुझाएको मुसहर्नीमाई सामुदायिक वनका अध्यक्ष मेघराज सुवेदीले बताए ।

पर्साको चोर्नी गाबिसबाट ना.२.त.३८५० नम्बरको ट्रयाक्टरमा लोड गरी सिमरातर्फ ल्याउँदै गरेको अवस्थामा गाउँलेले ३५.६८ क्युफिट सालको काठ पनि नियन्त्रण लिएका छन् । ट्रयाक्टरलाई स्कर्टिङ गरिरहेको अवस्थामा स्थानीयले ईलाका प्रहरी कार्यलय सिमराको ना.१.झ.१३३२ नम्बरको प्रहरी भ्यान पनि नियन्त्रणमा लिएका थिए ।

जिल्ला प्रहरी कार्यालय कलैयाले तस्करीमा संलग्नमध्ये दुई असई र एक हवल्दारलाई ५ साउनमै निलम्बन गरेको जनाएको छ । प्रहरी उपरीक्षक इश्वरबाबु कार्कीले कानुन विपरित कार्यमा संलग्न रहेको भेटिएकाले उनीहरुलाई निलम्बन गरेको बताए ।

श्याम गुप्ता, बारा

प्रतिकृया दिनुहोस