तस्वीर सौजन्य: जिल्ला प्रहरी कार्यालय बाँके

जिल्ला प्रहरी कार्यालयको टोलीले नेपालगञ्ज—५ स्थित बडिकालिका होटलबाट १४ लाख ४१ हजार ५०० भारतीय रूपैयाँ र साढे एक किलो यार्सागुम्बासहित सात जनालाई ६ साउन साँझ पक्राउ गरेको प्रहरी नायव उपरीक्षक सुशीलसिंह राठौरले जानकारी दिएका छन् ।

सुराकीको आधारमा यार्सागुम्बाको कारोबार गरिरहेको अवस्थामा पक्राउ गर्न पुगेका प्रहरी जवान पूर्णबहादुर महतरालाई कारोबारीले कुटेका थिए । त्यसपछि थप प्रहरी परिचालित भई उनीहरुलाई नियन्त्रणमा लिइएको थियो ।

पक्राउ पर्नेहरूमा कालीकोट थ्रिपु— ५ का जग्गबहादुर रोकाया र मानबहादुर रोकाया,  कालिकोट पैंक- ५ घर भई नेपालगञ्ज बस्ने विरेन्द्र आरसी,  जुम्ला कालीकाखेतु—३ का विष्णुप्रसाद जैसी र पुरन जैसी, कालीकोट सियाखाला—६ का दीपनाथ योगी र होटेल सञ्चालक कैलालीका नरेश माझी छन् ।

उनीहरूको साथबाट प्रहरीले नेपाली रूपैयाँ एक हजार १२० पनि बरामद गरेको जनाएको छ ।

यार्सा संकलन र निकासीका लागि सम्बन्धित निकायमा तोकिएको राजश्व दस्तुर बुझाएर छुट पूर्जी लिनु पर्ने कानूनी व्यवस्था छ ।
तुफान न्यौपाने, नेपालगञ्ज

प्रतिकृया दिनुहोस