नेपाल पत्रकार महासंघ ललितपुर शाखाका सदस्य तथा कारोबार दैनिकका कालिकोटस्थित सम्वाददाता रमेश रावललाई समाचार संप्रेषण गरेको आधारमा विभिन्न पक्षबाट धम्की आई ज्यानको असुरक्षा भएपछि उनी काठमाडौं आएका छन् ।

रावललाई धम्की दिइएकोप्रति नेपाल पत्रकार महासंघले आफ्नो गम्भीर ध्यानाकर्षण भएको जनाएको छ ।

“प्रकाशित समाचारप्रति गुनासो वा असहमति रहे त्यसको कानुनी उपचारको विकल्प हुँदाहुँदै पत्रकारलाई ज्यानको धम्की दिई विस्थापित हुन बाध्य बनाउनु प्रेस तथा अभिव्यक्ति स्वतन्त्रतामाथिको ठाडो हस्तक्षेप हो,” महासंघद्वारा जारी विज्ञप्तिमा भनिएको छ ।

मिसन टोली खटाइयो
महासंघले घटनाको तत्काल छानबिन गरी दोषीमाथि कडा कारबाही गर्न र पत्रकार रावललाई जिल्ला फर्केर सुरक्षित वातावरणमा पत्रकारिता गर्ने अवस्था सिर्जना गरिदिन स्थानीय प्रशासनसँग माग गरेको छ ।

त्यसैगरी रावललाई विस्थापित हुन बाध्य पारिने सबै कारणसहित सत्य–तथ्य छानबिन गर्न नेपाल पत्रकार महासंघका केन्द्रीय सदस्यद्वय झलक गैरे र नवराज महतारासहितको ‘मिसन’ टोली कालिकोटतर्फ प्रस्थान गरिसकेको छ ।

मिसन टोलीको रिपोर्टको आधारमा महासंघले थप अभियान थाल्ने पनि विज्ञप्ति मार्फत जानकारी गराएको छ ।

प्रतिकृया दिनुहोस