एमाले केन्द्रीय कार्यालयमा ११ असोजमा बसेको १९ दलको बैठकले वर्तमान सरकार नहटेसम्म सहमति नहुने भन्दै सरकार विरुद्ध आन्दोलन गर्ने एकमतले निर्णय गरेपनि आन्दोलनका कार्यक्रमका लागि थप तयारी र छलफल आवश्यक भएको हुँदा १५ असोजमा मात्रै कार्यक्रम सार्वजनिक गरिने बैठकमा सहभागी नेपाली काँग्रेसका प्रवक्ता दिलेन्द्र प्रसाद बडुले जानकारी दिए ।

यसअघि ९ असोजमा बसेको विपक्षी दलहरुको बैठकले ११ असोजमा कार्यक्रम सार्वजनिक गर्ने निर्णय गरेको थियो ।

“बाबुराम भट्टराई नेतृत्वको सरकार राष्ट्रियहित विरोधि, भ्रष्ट र सहमतिको बाधक भएकोले यो सरकार तत्कालै हट्नु पर्छ भन्नेमा सबैको एकमत रह्यो,” बडुले भने ।

मधेश केन्द्रित विपक्षी दलहरु आफ्नो आन्तरिक छलफलमा व्यस्त रहेकाले पनि कार्यक्रम सार्वजनिक हुन नसकेको एमाले नेता रघुजी पन्तले वताए ।

बैठकमा आन्दोलनका लागि संयुक्त कार्यदल बनाउने एजेन्डामा नेकपा–माओवादीले असहमति जनाए पनि आन्दोलनलाई पूर्ण सहमति गर्ने जनाएको छ । बैठकको समाप्तिभन्दा केही पहिले नै बाहिरिएका नेकपा–माओवादीका नेता देव गुरुङले कार्यदल बनाउने र त्यसमा रहने भत्रे विषयमा थप छलफल गर्नुपर्ने भए पनि आन्दोलनमा भने पूर्ण समर्थन रहने प्रतिबद्धता जनाए । ।

“कार्यदल गठनका लागि उहाँहरुको पार्टीभित्रै छलफल गर्नुपर्ने भएकोले त्यसबारेमा अहिले निर्णय भएन तर आन्दोलनमा उहाँहरुको पूर्ण समर्थन र सहभागिता रहनेछ” एमाले नेता पन्तले प्रष्ट्याए ।

बैठकपछि जारी प्रेस विज्ञप्तिमा प्रधानमन्त्री बाबुराम भट्टराईले राष्ट्रपति रामवरण यादवमाथि लाञ्छना लगाउने र राष्ट्रपतिलाई विवादमा तान्ने अभिव्यक्ति बारम्बार व्यक्त गरिरहेको भन्दै त्यसको कडा आलोचना र भत्र्सना गरिएको उल्लेख छ ।

“संविधानसभालाई षडयन्त्रमुलक ढंगले समाप्त पार्ने वर्तमान एमाओवादी उपाध्यक्ष बाबुराम भट्टराईको सरकार अधिनायकवादी, राष्ट्रिय हित विरोधी, भ्रष्ट र सहमतिको प्रमुख वाधक भएकोले यो सरकार नहटेसम्म कुनै पनि प्रकारको सहमति नहुने कुरामा यो बैठक विशेष जोड दिन चाहन्छ,” विज्ञप्तिमा भनिएको छ, “असंवैधानिक, अलोकतान्त्रिक र जनविरोधी वर्तमान सरकार तत्काल हट्नु पदर्छ ।”

आन्दोलन शान्तिपूर्ण र अहिंसात्मक हुनु पर्ने भन्दै आन्दोलकारी कुनै दल वा समूहले आन्दोलनलाई उद्देश्य विपरित अन्यत्रै मोड्न सक्नेतर्फ सचेत हुनुपर्ने आवश्यक्ता रहेकोमा नेपाली काँग्रेसले विशेष जोड दिएको काँग्रेस प्रवक्ता दिलेन्द्रप्रसाद बडुले वताए ।

नेकपा–माओवादीले भारतीय नम्बर प्लेटका गाडीहरु चल्नमा रोक लगाउनुका साथै हिन्दी गीत–संगीत र चलचित्रमाथि बन्देज लगाउन खोजेकोमा आफ्नो गम्भीर ध्यान आकर्षण भएको भन्दै काँग्रेस सभापतिले बैठकमा विषय प्रवेश गराएका थिए ।

प्रतिकृया दिनुहोस