नारायणी नदीमा पानीको सतह बढेपछि चितवनका केही वस्तीहरु डुबानमा परेका छन् । तस्वीर: सविता श्रेष्ठ

जिल्ला प्रहरी कार्यालय चितवनले दिएको जानकारीअनुसार ३० साउन बिहान ११:३० बजे खसेको पहिरोले पृथ्वी राजमार्गको नारायणगढ–मुग्लिन सडकखण्ड अवरुद्ध भएको छ ।

सडक खुलाउनका लागि मुग्लिनबाट डोजर गइसकेको र भरतपुरबाट पनि पठाउने तयारी भइरहेको प्रहरी नायब उपरीक्षक शान्तिराज कोइरालाले बताए । माथिबाट ठूलाठूला ढुङ्गा खसेकाले पहिरो हटाउन सहज नभएको र केही घण्टामा एकतर्फी सडक खुलाइने कोइरालाले जानकारी दिए ।

वस्ती डुवानमा, पहिरोले महिलाको मृत्यु

चितवनको शक्तिखोरमा पहिरोले पुरिएर एक गर्भवती महिलाको मृत्यु भएको छ ।

खेतमा काम गरिरहेको अवस्थामा २९ साउन दिउँसो पहिरोले पुरिएर २२ वर्षीया रेणुका चेपाङको मृत्यु भएको हो । त्यस्तै खोलातर्दा वेपत्ता भएका मुर्चुङा चेपाङको शव ३० साउनमा फेला परेको प्रहरीले जनाएको छ ।

वर्षाका कारण रत्ननगर ५ को रमाईलो बस्ती डुबानमा परेको छ । डुबानमा परेका २२ घरका ८४ जनाको उद्धार गरिएको छ ।

वर्षाका कारण नारायणी र रापती नदीको तटीय क्षेत्रका बासिन्दालाई सर्तक रहन सूचना जारी गरिएको चितवनका निमित्त प्रमुख जिल्ला अधिकारी शिवराम गेलालले जानकारी दिए ।
सविता श्रेष्ठ, चितवन

प्रतिकृया दिनुहोस