अर्घाखाँचीमा तीज गीत प्रतियोगिताका सहभागी । तस्वीर: प्रेमनारायण आचार्य

“दोस्रो चुनाव भएको नी नौ महिना भैसक्यो, संविधान बन्दैन कि शंका लाईसक्यो, ” तीज गीत प्रतियोगितामा महिलाहरुले यसरी संविधान निर्माणप्रति चिन्ता र चासो देखाए ।

अर्घाखाँचीको फुदबांगस्थित फुलबारीमा स्थानीय महिला समूहले संविधान निर्माणबारे यस्ता धेरै टुक्का जोडेर गीत गाए ।

उनीहरुले नेताहरु संविधान निर्माणमा इमान्दार नदेखिएको, जनतालाई झुक्काएको भन्दै चोटिला गीतहरु तीजको भाकामा गाए ।

बाढी पहिरोमा परी सयौंले ज्यान गुमाएको र पीडीतले राहात नपाएको पीडा पनि गीतमार्फत व्यक्त भएको थियो ।

यसअघि जस्तो घर परिवारको किचलो, बुहार्तनको दुखका गीत भन्दा देश, दुनियाँकै चासोको गीत गाउँदै महिलाहरु नाचेका थिए ।

“बस न युवा गाँउ गाँउमा, उद्योग खोलौ ठाँउ ठाँउमा” स्थानीय राधाकृष्ण समूहले यो गीत सुरिलो भाकामा गाउँदा सबै जुरुक्क उठेर नाच्न तम्सिए । यो समूहले स्वदेशमा अवसर नपाउँदा विदेशिनुपर्नेको पीडा समेत गीतमा समेटेको थियो ।

फुलबारी रिसोर्ट फुदबांगको आयोजनामा भएको जिल्ला स्तरीय तीज गीत प्रतियोगीतामा राधाकृष्ण महिला समूह फुदबांग प्रथम, प्रगतिपुञ्ज महिला समूह भालुखोला द्वितीय र सृजनशिल आमा समूह खाँचीकोट तृतीय भए ।

तीज गीत प्रतियोगितामा हजारौंको संख्यामा स्थानीय उपस्थित थिए ।
प्रेमनारायण आचार्य, अर्घाखाँची

प्रतिकृया दिनुहोस