प्रधानमन्त्री निवास बालुवाटारमा १७ भदौमा बसेको नेपाली कांग्रेस, नेकपा एमाले, एमाओवादी र नेकपा–माओवादीबीचको वार्तामा एमाओवादीले सर्वपक्षीय सम्मेलन गर्नेसम्बन्धी यसअघिका ८ बुँदे माग अघि सारेको छ ।

मुख्य दलहरुले भने मागबारे छलफल गरेर १९ भदौमा फेरि वार्ता गर्ने बताएका छन् ।

बैठकमा सहभागी एक नेताका अनुसार यसअघि २६ जेठमा नै एमाओवादीले अघि सारेका ८ बुँदे मागप्रति तीन दलले पुनर्विचार गर्न आग्रह गरेपछि नेकपा–माओवादीका नेताहरु वार्ता हुन नसक्ने भन्दै आक्रोशित भएका थिए ।

तर, फेरि ८ बुँदेप्रति तीन दलको साझा धारणा बनाएर वार्तामा बस्ने सहमति भएको थियो ।
यस्तो छ नेकपा–माओवादीको ८ बुँदे माग:

सर्वपक्षीय सभाबारे

१. नाम: सर्वपक्षीय राष्ट्रिय राजनीतिक सभा

२. क्षेत्राधिकारः दलहरुबीचमा विगतमा भएका सहमतिहरुको कार्यान्वयन र जनताको संविधान निर्माणलगायत राष्ट्रिय राजनीतिक विषयहरुमा दहरुबीच राष्ट्रिय राजनीतिक सहमति कायम गर्ने ।

३. आयोजकः तत्काल नेपाली कांग्रेस, नेकपा एमाले, एनेकपा माओवादी र नेकपा–माओवादीबीच आपसी सहमतिबाट आयोजना गर्ने ।

४. व्यवस्थापनः नेपाल सरकारले गर्ने ।

५. सहभागिताः संविधानसभा–२ मा भएका दलहरु र ३३ दलीय मोर्चामा रहेका दलहरु रहने ।

६. कार्यसूची: आयोजक ४ दलले आपसी सहमतिबाट कार्यसूची तय गरी प्रस्ताव गर्ने ।

७. निर्णय प्रक्रियाः सहभागी सबै दलहरुबीच सहमतीय प्रणालीबाट निर्णय गर्ने ।

८. निर्णय कार्यान्वयनः संविधान निर्माणसम्बन्धी निर्णयहरु सर्वपक्षीय राष्ट्रिय राजनीतिक सभा स्वयम्ले गर्नेछ । राज्यका अन्य निकायहरुमार्फत् कार्यान्वयन गरिनुपर्ने निर्णयहरुको सम्बन्धमा सम्बन्धित निकायहरुको जिम्मेवारी रहेका राजनीतिक दलहरुले गर्ने ।

मिति: २०७१ जेठ २६ गते
नेकपा–माओवादी

प्रतिकृया दिनुहोस