गुणदेव घिमिरे (बायाँ) र कृष्ण उपाध्याय । तस्वीर साभारः द इन्डिपेन्डेन्ट

नर्वेली स्वयमसेवी संस्था ‘ग्लोबल नेटवर्क फर राइट्स एण्ड डेभलपमेन्ट’ (जीएनआरडी) का तर्फबाट कतारमा काम गर्ने नेपालीहरुको दुखबारे वृत्तचित्र बनाउन दोहा पुगेका मानवअधिकारवादी कृष्ण उपाध्याय र टेलिभिजन पत्रकार गुणदेव घिमिरे तीन दिनदेखि वेपत्ता रहेको जीएनआरडीले जनाएको छ ।

बेलायती राहदानी बाहक दुवैजनालाई सादा पोशाकमा रहेका कतारी सुरक्षाकर्मीले नियन्त्रणमा लिएको र उनीहरुलाई यातना दिइएको हुनसक्ने जीएनआरडीले आशंका व्यक्त गरेको बेलायतबाट प्रकाशित हुने पत्रिका ‘ द इन्डिपेन्डेन्ट’ ले उल्लेख गरेको छ ।

सन् २०२२ मा कतारमा आयोजना हुने विश्वकप फुटबलका लागि रंगशाला लगायतका सुविधा निर्माणमा संलग्न नेपाली मजदुरप्रति पीडादायी व्यवहार भएको र उनीहरुको सुरक्षाप्रति बेवास्ता गरिएको भन्ने रिपोर्टहरु प्रकाशित भएपछि दुवैजना त्यसैबारे वृत्तचित्र बनाउन कतार पुगेका थिए । गत आइतबारदेखि उनीहरु बेपत्ता भएका हुन् ।

उपाध्याय र घिमिरेले सादा पोषाकमा रहेका प्रहरी जस्ता देखिने व्यक्तिले आफूहरुलाई पिछा गरिरहेको र उनीहरुले दुख दिन सक्ने भन्दै आफन्तलाई मोबाइलमा सन्देश पठाएका थिए । उनीहरुले कतार छोड्न चाहेको तर, होटेलबाट बाहिर निस्कंदा पक्राउ पर्ने सम्भावना रहेको पनि उल्लेख गरेको ‘द इन्डिपेन्डेन्ट’ ले जनाएको छ ।

कतारमा मजदुरहरुको शिविरमा गएर अन्तर्वार्ता गर्दा असुरक्षित हुने भएपछि उनीहरुले नेपाली दूतावासमा आउने गरेका मजदुरहरुसँग दूतावास परिषरमै अन्तर्वाता लिने गरेका थिए ।

नेपाली कुटनीतिज्ञसँगै रहेका बेला पनि कतारी सुरक्षाकर्मीले उपाध्यायलाई पिछा गरिरहेपछि गैर कुटनीतिक कार्य नगर्न भन्दै नेपाली दूतावासका कर्मचारीले हस्तक्षेप गर्नुपरेको थियो ।

जीएनआरडीले कतारका अधिकारीहरुसँग पटकपटक सोधखोज गर्दा पनि हराएका आफ्ना कर्मचारीबारे कुनै जवाफ प्राप्त नभएको जनाएको छ । उसले आफ्ना कर्मचारीको सुरक्षाप्रति जिम्मेवार हुन कतारका अधिकारीहरुलाई अपिल गरेको छ । उनीहरुलाई शारीरिक वा मानसिक यातना दिइएको पाइएमा त्यसविरुद्ध कानूनी कार्वाही अघि बढाइने पनि जीएमआरडीले जारी गरेको विज्ञप्तिमा उल्लेख छ ।

गैरआवासीय नेपाली संघ, वेलायतका पूर्व संयोजक समेत रहेका र वेलायतबाटै विद्यावारिधि गरिरहेका ५२ वर्षीय उपाध्याय भर्खरै लन्दनबाट नर्वे पुगेका थिए । त्यहाँबाट उनी ३६ वर्षे फोटोग्राफर घिमिरेसँगै दोहा गएका थिए । नेपाल पत्रकार महासंघ, यूके शाखामा आवद्ध घिमिरे लण्डनबाट सञ्चालित नेपाली टेलिभिजनका क्यामेरामेन हुन् ।

गत आइतबार रातिको फ्लाइटबाट नर्वे जाने तयारीमा दिउँसो दोहास्थित ग्रान्ड हायात होटेलबाट ‘चेकआउट’ गरेका उपाध्याय र घिमिरेले बाहिर प्रहरीको बाक्लै उपस्थिति देखेपछि होटेलकै रिसेप्सनबाट आफूहरु असुरक्षित भएको म्यासेज पठाएको उनका एक साथीले जानकारी दिएका छन् ।

कतारमा आप्रवासी मजदुरहरुप्रति गरिने ब्यवहारबारे अन्तर्राष्ट्रिय सञ्चारमाध्यममा आउने समाचार र मानवअधिकारवादी संस्थाहरुको प्रतिक्रिया उसको टाउको दुखाइको विषय भएको छ । त्यसैले वृत्तचित्र बनाउन पुगेका घिमिरे र उपाध्यायलाई प्रहरीले नियन्त्रणमा लिएको हुनसक्ने ‘द इन्डिपेन्डेन्ट’ ले उल्लेख गरेको छ ।

बेलायतस्थित कतारको दूतावासले यसबारे कुनै प्रतिक्रिया जनाएको छैन । जनवरी २०१२ देखि मे २०१४ सम्म कतारमा ४०० नेपालीको मृत्यु भइसकेको पनि पत्रिकाले उल्लेख गरेको छ ।

प्रतिकृया दिनुहोस