संविधानसभाको दोस्रो चुनावमा आफ्नै पार्टीका उम्मेदवारलाई हराउन भूमिका खेलेको भन्दै कांग्रेस अनुशासन समितिले केन्द्रीय सदस्य, सभासद्, पूर्वमन्त्रीदेखि क्षेत्रीय सभापतिसम्मका १८३ जनालाई कारवाहीको सिफारिस गरेको छ ।

समितिले ७ असोजमा कार्यबाहक सभापति रामचन्द्र पौडेललाई प्रतिवेदन बुझाएको छ । केन्द्रीय समितिले अनुमोदन गरेपछि छानबिन समितिको सिफारिस कार्यान्वयनमा जानेछ ।

समितिले दोस्रो संविधानसभा चुनावमा भएको अन्तर्घातका विषयमा छानबिन गरेको थियो ।

छानबिन समितिले नेतृ कोइरालालाई बहाल रहेको पदीय दायित्व र जिम्मेवारीमा तीन महिनाको प्रतिबन्ध लगाएको छ । उनले मोरङ–१ का कांग्रेस उम्मेदवार आमोदप्रसाद उपाध्यायलाई हराउन भूमिका खेलेको छानबिन समितिको ठहर छ । उपाध्याय छानबिन समितिका पनि संयोजक हुन् ।

नेतृ कोइराला केन्द्रीय सदस्यसँगै पार्टीको विदेश विभाग प्रमुख पनि छिन् । उनी चुनावमा टिकट बाँड्ने संसदीय बोर्डको सदस्य र समानुपातिक सभासद् पनि हुन् ।

गिरिजाप्रसाद कोइरालाले चुनाव लड्दै आएको मोरङ–१ बाट सुजाताले लड्ने इच्छा गरे पनि पार्टीले उपाध्यायलाई उम्मेदवार बनाएको थियो । तर, कोइरालासहितका नेताले अन्तर्घात गरी उपाध्यायलाई हराएको ठहर गर्दै अनुशासन समितिले कारबाहीको सिफारिस गरेको हो ।

कांग्रेस विधानमा अनुशासनविपरीत कार्य गरेमा ६ महिना निलम्बनदेखि तीन वर्षसम्म पार्टी सदस्यबाटै निष्कासन गर्न सक्ने प्रावधान छ ।

त्यस्तै, कारबाहीमा पर्नेमा एक सभासद्, एक पूर्वमन्त्री, क्षेत्रीय सभापति र महासमिति सदस्य पनि छन् । उनीहरूलाई अन्तर्घातको प्रकृति हेरी नियमावलीअनुसार सचेत गराउने, पदीय दायित्व नै रोक्नेसहितका कारबाही भएको स्रोतले जनाएको छ ।

समानुपातिकतर्फका सभासद् गणेशप्रसाद बिमली, बिपी संग्रहालयका अध्यक्ष पर्शुराम पोखरेल, पूर्वमन्त्री सुशीला स्वाँर पनि कार्वाहीको सूचिमा छन् ।

नयाँ पत्रिका दैनिकबाट

प्रतिकृया दिनुहोस