इबोला प्रभावित मुलुक लाइबेरियाबाट शान्ति स्थापनाको मिसन पूरा गरी स्वदेश फर्केका सशस्त्र प्रहरीका १३१ सुरक्षाकर्मीलाई निगरानीका लागि सशस्त्र प्रहरीको संयुक्त राष्ट्र सङ्घीय शान्ति स्थापना तालिम केन्द्र ककनीमा राखिएको छ ।

३० असोज राति फर्किएको उक्त टोलीलाई तीन सातासम्म सशस्त्र प्रहरीको स्वास्थ्य टोली र अन्य चिकित्सकसहितको स्वास्थ्य टोलीले नियमित स्वास्थ्य परिक्षण गर्ने सशस्त्र प्रहरी बल प्रधान कार्यालयको सूचना शाखाले जनाएको छ ।

टोलीका सबै सदस्यलाई लाइबेरियामा रहँदा इबोलाका विषयमा विस्तृत जानकारी दिएको भएपनि उनीहरू सङ्क्रमित छन् की छैनन् भन्ने स्पष्ट थाहा पाउनका लागि स्वदेश फर्किएलगतै कडा निगरानीमा राखिएको हो ।

सूचना शाखाका अनुसार टोलीका सदस्यको खाना खाने मेस एवम् त्यहाँ प्रयोग हुने सम्पूर्ण सामग्रीको छुट्टै व्यवस्था गरिएको छ । उनीहरूलाई कसैसँग पनि भेट्न दिइएको छैन ।

विश्व स्वास्थ्य सङ्गठनका अनुसार इबोला भाइरस सङ्क्रमितको शरीरबाट निस्कने तरल पदार्थ अर्थात् ¥याल, रगत, दिसा, पिसाब, पसिनाको माध्यमबाट स्वस्थ्य व्यक्तिमा उक्त रोग सर्छ ।

ज्वरो, घाँटीमा खसखस, मांसपेसी र टाउको दुख्नु, शरीरमा विभिन्न प्रकारका धब्बा देखिनु, वाकवाकी लाग्नु, पखाला लाग्ने आदि सो रोगका लक्षण हुन् ।
रासस

प्रतिकृया दिनुहोस