पाँचथरमा २२ दलले गरेको सभाका सहभागी ।

पाँचथरमा आयोजित सभालाई सम्बोधन गर्दै एमाओवादी अध्यक्ष पुष्पकमल दाहालले बृहद शान्ति सम्झौता विपरित ६ प्रदेशको अवधारणा राख्ने कांग्रेस–एमालेलाई सरकार चलाउने संवैधानिक आधार नभएकाले अव २२ दलीय मोर्चाले राज्य चलाउनुपर्ने दाबी गरेका छन् । दाहालले भने, ‘‘बृहत शान्ति सम्झौता, १२ बुँदे सहमति र अन्तरिम संविधानको मर्मविरोधी दलहरुलाई सरकार चलाउने राजनैतिक र संवैधानिक अधिकार छैन ।’’

उनले दुई दलले ल्याएको प्रदेशको संख्यामा संघीयताको कुनै गन्ध नभएको बताए । दाहालले भने, ‘‘५ विकास क्षेत्रलाई ६ बनाउने वा १४ अञ्चललाई ७ मा झार्ने प्रस्ताव संघीयताको मर्म अनुसार होइन ।’’ कांग्रेस–एमालेको प्रस्ताव फिर्ता हुनुपर्ने भन्दै दाहालले उक्त प्रस्तावलाई ‘गधाको खोल लगाएको मान्छे’को संज्ञा दिए ।

सभामा मधेशी जनाधिकार फोरम लोकतान्त्रिकका अध्यक्ष विजयकुमार गच्छदारले बहुमतबाट जारी गरिएको संविधान मान्य नहुने बताए । मधेशी जनाधिकार फोरम नेपालका अध्यक्ष उपेन्द्र यादवले कांंग्रेस र एमालेलाई पहिचान र संघीयता विरोधीको आरोप लगाए ।

एकल जातीय पहिचान पक्षधर २२ दलले १८ कात्तिकमा आयोजित सभामा २० हजार उतारेर कांग्रेस–एमालेलाई झट्का दिने भनिएको भए पनि सभामा करिब तीन हजारको मात्रै सहभागिता थियो ।

लक्ष्मी गौतम, पाँचथर

प्रतिकृया दिनुहोस