मन्त्रिपरिषद्को २७ कात्तिकको बैठकले सार्कको काठमाडौं शिखर सम्मेलनमा हुने सम्झौता तयारीका लागि परराष्ट्र मन्त्री महेन्द्रबहादुर पाण्डेलाई अख्तियारी दिने निर्णय गरेको सूचना तथा सञ्चार मन्त्री मीनेन्द्र रिजालले जानकारी दिए ।

सम्मेलनमा सार्कका मुलुकहरुबीच रेल तथा सवारी साधन सम्झौताका साथै ऊर्जा सहयोगसम्बन्धी विभिन्न सम्झौताहरु हुने बताइएको छ ।

त्यसैगरी सरकारले नागरिक लगानी कोषको कार्यकारी निर्देशकमा रामकृष्ण पोखरेल, नेपाल दूरसञ्चार प्राधिकरणको सदस्यमा टीकाप्रसाद उप्रेती र भूमिगत जलस्रोत विकास समितिको कार्यकारी निर्देशकमा जगतप्रसाद जोशीलाई नियुक्त गर्ने निर्णय गरेको छ ।

बैठकले राष्ट्रिय अनुसन्धान विभागको सह–अनुसन्धान निर्देशकहरु यदुलाल खरेल, राजुकुमार अर्याल, यादवप्रसाद रेग्मी र यतिराज पङ्गेनीलाई बढुवा गर्ने निर्णय गरेको सरकारका प्रवक्तासमेत रहेका सञ्चार मन्त्री रिजालले बताए ।

त्यस्तै सरकारले स्वास्थ्य शिक्षासम्बन्धी राष्ट्रिय नीति निर्माणका लागि उच्चस्तरीय कार्यदल गठन गर्नुका साथै नेपाली सेनाका केही सहायक रथी र महासेनानी अधिकृतहरुको सरुवा पनि गरेको छ ।

प्रतिकृया दिनुहोस