एमाओवादीको संसदीय दलको कार्यालय सिंहदरबारमा १३ मंसीरमा बसेको एमाओवादी नेतृत्वको २२ दलीय मोर्चाको बैठकले सार्क सम्मेलनका अवसरमा मुलुक एकीकृत भएर लागेको र सबैले उत्तिकै सहयोग गरेको ठहर गर्दै सहमति भएका विषयको ठोस कार्यान्वयन हुनुपर्ने बताएको छ ।

सरकार पक्ष र प्रतिपक्ष नभनीकन क्षेत्रीय सङ्गठनको सम्मेलन सफल पार्न भूमिका खेलेको र आगामी दिनमा त्यसबाट पारित भएका विषयको पूर्ण कार्यान्यवन हुनुपर्ने र त्यसका लागि सरकारले विशेष तत्परता अपनाउनसमेत मोर्चाले आग्रह गरेको छ ।

सार्क सचिवालयलाई व्यवस्थित र प्रभावकारी बनाउनका लागि पनि मोर्चाले माग गरेको छ ।

दक्षिण एसियाली क्षेत्रमा गरिबीको दर उल्लेख्य रहेकाले त्यसविरुद्धको लडाईंलाई केन्द्रित गर्न र प्रतिबद्धतालाई कार्यान्वयन गर्न तथा गराउन पनि मोर्चाले ध्यानाकर्षण गराएको छ ।

यस्तै संविधान निर्माणमा देखिएका विवादित विषयमा समेत तत्काल सहमति जुटाएर आगामी माघ ८ गतेभित्र संविधान जारी गर्नका लागि मोर्चाले विशेष पहल गर्ने निर्णय गरेको एमाओवादीका अध्यक्ष पुष्पकमल दाहालले जानकारी दिए ।

बैठकपछि सञ्चारकर्मीसँग कुरा गर्दै अध्यक्ष दाहालले मोर्चाले हालसम्म आयोजना गरेको जनसभा र सङ्घर्षका कार्यक्रमको समीक्षा गरिएको र आगामी दिनमा के–कस्तो कार्यक्रम र रणनीति अगाडि बढाउने भन्ने विषयमा समेत बैठकमा विचार विमर्श भएको बताए ।

दाहालले भने, “आइतबार मोर्चा र सरोकार भएका सबै पक्षसँग छलफल गरेर अगाडि बढ्छाँै । तोकिएको समयमा संविधान जारी गरिनुपर्छ । त्यसका लागि मोर्चामा रहेका दलहरु प्रतिबद्ध छन् ।”

बैठकमा मोर्चाका आबद्ध दलहरुले तत्काल जनपरिचालनका कार्यक्रम अगाडि सार्नुपर्ने धारणा राखेका थिए ।
रासस

प्रतिकृया दिनुहोस