रु ११ करोड अनुमानित लागतमा साढे दुई वर्षअघिदेखि पशुपति क्षेत्रमा निर्माण शुरु भएको विद्युतीय शवदाहगृह तीन महिनापछि सञ्चालनमा आउने पशुपति विकास कोषका सदस्य सचिव गोविन्द टण्डनले बताएका छन् ।

शवदाहगृहको काम सकिन लागेको र शव राख्ने ठाउँ (फरर्नेस) को काम पनि ७० प्रतिशत सकिसकेको कोषका वरिष्ठ निर्देशक श्याम शेखर झाले जानकारी दिए ।

शवदाहका लागि ‘इन्डोमेन इन्जिनियरिङ वर्क’ कोलकात्ता भारतबाट रु तीन करोड ६० लाखमा शवदाह मेसिन खरिद गरिएको छ । सो मेसिन जडानका लागि कम्पनीका मिस्त्री नेपाल आई काम गरिरहेको झाले बताए । विद्युतीय शवगृहमा पौने घन्टामा शव खरानी बन्ने झाले जानकारी दिए ।

शवदाहगृहमा करिब २० शव राख्न सकिने फ्रिजसहितको भण्डार रहनेछ । साथै क्रियापुत्रीका लागि तातो र चिसो पानी व्यवस्था भएको स्नानगृहसहितका कोठाहरू पनि रहनेछन् । शवदाह गर्ने बेलामा मलामी रहने कोठाको पनि निर्माण गरिएको छ ।

गृह सञ्चालनमा आएपछि २४ घन्टा विद्युत् आवश्यक पर्ने भएकाले नेपाल विद्युत् प्राधिकरणसँग साढे २१ लाखमा विद्युत् जडानको सम्झौता गरिएको छ । सव–स्टेसन निर्माणको काम पनि भइरहेको बताउँदै वरिष्ठ निर्देशक झाले शवदाहबाट निस्कने धुवाँ छानिएरमात्र निस्कने व्यवस्था भएकाले वायु प्रदूषण धेरै नहुने बताए ।

काठमाडौँको पशुपति आर्यघाटमा दिनहुँ १५ जनाभन्दा बढी मानिसको दाहसंस्कार हुन्छ । प्रतिशव २५० किलो दाउरा आवश्यक पर्छ । दिनमा पाँच हजार किलोग्रामभन्दा बढी दाउरा दाहसंस्कारका लागि आर्यघाट दाउरा डिपोले बिक्री गर्ने गरेको छ ।

दाउराको प्रयोगले हुने वायु प्रदूषण रोक्न, वातावरण स्वच्छ राख्नमात्र होइन विद्युतीय शवदाहगृह सञ्चालनमा आएपछि खर्च र समयको पनि बचत हुने छ ।

रासस

प्रतिकृया दिनुहोस