१८ मंसीरमा बसेको मन्त्रिपपरिषद बैठकले स्थानीय विकास प्रशिक्षण प्रतिष्ठानको कार्यकारी निर्देशकमा डा विष्णु सापकोटा, नेशनल ट्रेडिङ लिमिटेडको अध्यक्षमा दीर्घराज श्रेष्ठ, नेपाल खाद्य संस्थानको अध्यक्षमा प्रकाशबहादुर केसी र नेपाल पारवहन तथा गोदाम व्यवस्थापन कम्पनी लिमिटेडका अध्यक्षमा किशोरबहादुर कार्कीलाई नियुक्त गर्ने निर्णय गरेको छ ।

बैठकले नेपाली सेनाका महासेनानी ताराविक्रम शाहलाई सहायकरथी र अन्य आठजना प्रमुख सेनानीलाई महासेनानीमा पदोन्नति गर्ने निर्णय गरेको सरकारका प्रवक्तासमेत रहनुभएको सञ्चार मन्त्री डा रिजालले जानकारी दिए ।

त्यसैगरी सभासद् हरिबहादुर खड्काको दुर्घटनाको छानबिन गर्न जाँचबुझ समिति गठन गर्ने निर्णय गरेको छ ।

सभासद् खड्काको दुर्घटना छानबिनका लागि पुनरावेदन अदालतका पूर्व न्यायाधीशको अध्यक्षतामा गृह मन्त्रालय र दुवै सुरक्षा निकायको समेत प्रतिनिधित्व रहने गरी जाँचबुझ समिति गठन गरिने छ ।

१७ मंसीरमा बागलुङमा भएको मोटर दुर्घटनामा परी सभासद् खड्का गम्भिर घाइते भएका छन् ।

सरकारले सभासद् खड्काको शीघ्र स्वास्थ्य लाभको कामना गर्दै स्वास्थ्य उपचारमा लाग्ने सम्पूर्ण खर्च व्योहोर्ने निर्णयसमेत गरेको मन्त्री रिजालले बताए ।

बैठकले इबोला सङ्क्रमित बिरामीको उपचारमा संलग्न स्वास्थ्यकर्मीलाई इबोला सङ्क्रमण भई मृत्यु भएमा निजको आश्रित परिवारलाई रु २५ लाखसम्म क्षतिपूर्ति दिनसक्ने नीतिगत निर्णय पनि गरेको छ ।

त्यसैगरी सरकारले इटालीको मिलानमा हुने वल्र्ड एक्स्पो २०१५ मा सहभागिता जनाउने र एक्स्पोमा आफ्नो कक्ष राख्नेसमेत निर्णय गरेको छ ।

प्रतिकृया दिनुहोस