तस्वीरहरुः सानुबाबु तिमिल्सिना

दश वर्ष साउदी अरबमा पसिना बगाएका धादिङ बेनीघाट–९ सलाङघाटका २९ वर्षीय सुदर्शन त्रिपाठीलाई त्यहाँको कमाइ कहिल्यै पुग्दो भएन । विदेशीभूमिमा झेलेका दुःख, पीडा र खप्की सम्झिदा चैनको दिन आउला भन्ने कहिल्यै लागेको थिएन । परिवार, नातागोता र गाउँघरको न्यास्रो त छँदैछ । त्यसैले, उनी विदेशको कमाइ चटक्कै छाडेर एक वर्ष अघि स्वदेश नै फर्किए ।

स्वदेश फर्किदाँ उनीसँग यतै केही गर्न सकिन्छ भन्ने बलियो आत्मविश्वास भने थियो । उनले आफ्नै गाउँमा व्यवसायिक पशुपालनमा शुरु गरे ।

दर्शन एग्रिटेक फर्म शुरु गरेका उनले एक वर्षमै सफलता पाउन थालिसकेका छन् । उनीसँग अहिले तीन वटा भैंसी, नौ वटा गाई र ३० वटाभन्दा बढी बाख्रा भइसकेका छन् ।

उनले अहिले विदेशको भन्दा बढी कमाइ गर्न थालेका छन् । दैनिक ५० लिटर दुध बिक्री गर्दै आएका उनी भन्छन्, “अहिले महीनामा रु.५० हजारको हाराहारीमा कमाइरहेको छु ।”

उनले आफ्नै जग्गामा भएको घाँस–परालबाट गाईभैंसीलार्य आहारा पुर्‍याउँदै आएका छन् । जग्गामा लगाएको उन्नत जातको घाँस र खेतबाट आउने परालले नपुगे केही पराल किन्नुपर्ने अवस्था रहेको उनी बताउँछन् ।

“उनले व्यवसाय बढाएर गाईभैंसी ३० सम्म पुर्‍याउँने छु,” उनी आफ्नो योजना सुनाउँछन्, “आफ्नै जग्गा जमिनमा अझै पनि पर्याप्त घाँस छ र उत्पादित दुधको बजार पनि राम्रो छ ।”

उनले आफ्नो व्यवसायका लागि परिवारबाट पनि राम्रो साथ र सहयोग राम्रो पाइरहेका छन् । उनी भाइ अर्जुन र बुबा नारायणले पनि सघाउने बताउँछन् ।

सानुबाबु तिमिल्सिना, धादिङ

प्रतिकृया दिनुहोस