ङिमा पाख्रिन, न्यूयोर्क

नयाँ वर्ष सन् २०१५ को पहिलो दिन न्यूयोर्कबाट प्रकाशित छापाहरुमा १६ वर्षीया नेपाली किशोरी सोनाम लामा समाचार बनिन् ।

तस्वीर: काउन्ट डाउन ईन्टर्टेन्मेन्ट

न्युयोर्कको केन्द्र मानिने टाइम्स स्क्वायरमा हरेक वर्ष आयोजना हुने न्यूइयर इभ उत्सवमा गरिने ‘वाटरफोर्ड क्रिस्टल बल ड्रप काउन्ट डाउन’को लागि स्वीच थिच्न यसपटक सोनाम र दक्षिणी सुडानका दुईजना आप्रवासी छानिएका थिए ।

सन् २०१५ न्यूइयर इभ उत्सवको अफिसियल च्यारिटी पार्टनर दि इन्टरनेशनल रेस्क्यु कमिटी (आईआरसी) ले सोनामलाई नयाँ वर्षको घोषणा गर्ने काउण्ट डाउनको स्विच अन गर्न अवसर प्रदान गरेको थियो ।

न्यूयोर्क आप्रवासीहरुको शहर भएकोले सम्मानमा आप्रवासीहरुलाई नै यो कामको लागि अघि सारिएको आईआरसीका प्रेसिडेन्ट एवं सिईओ डेभिड मिलिब्यान्डले बताए ।

यो संस्थाले युद्धपीडितहरुको उद्धार गरी उनीहरुलाई सुरक्षित ठाउँमा बसोबासको व्यवस्था मिलाउँछ। सोनाम पनि सन २०१२ मा आइआरसीकै सहयोगमा आफ्ना पितालाई भेट्न न्युयोर्क आएकी हुन् । उनी हाल क्वीनस्थित हाई स्कूलमा अध्ययन गर्दैछन् ।

चर्चित सेलिब्रिटी र लाखौं दर्शक माझ गरिने ‘क्रिस्टल बल ड्रप स्वीच थिच्नका लागि निम्त्याइनुलाई अमेरिकामा ठूलै सम्मान मानिन्छ ।

” जीन्दगीमा कहिल्यै नसोचिएको आश्चर्य प्राप्त भएको छ,” सोनामले भनिन् ।

नयाँ वर्ष शुरु हुने मध्यरातमा न्युयोर्कको टाइम्स स्क्वायरको क्रिष्टल बल ड्रप विश्वप्रख्यात छ । यो उत्सव हेर्न अमेरिकाभर र अन्य देशबाट समेत लाखौं मान्छे न्युयोर्कको टाइम्स स्वाक्यरमा भेला हुन्छन् जसको टेलिभिजनहरुले प्रत्यक्ष प्रशारण गर्छन् ।

यसपटक टाईम्स स्क्वायरमा जेनी म्याकर्थे, टेलर स्वीफ्ट, आईडिना मेन्जल, जेनकार्लोस क्यानेला लगायतले प्रस्तुती दिएका थिए ।

सोनामलाई स्वीच दवाउन क्युबेन-अमेरिकन कलाकार जेनकार्लोस क्यानेलाले साथ दिए । स्थानीय समयानुसार रातको ठीक १२ बज्नु एक मिनेट अगाडी उनीहरुले संयुक्त दबाएको स्वीचले बल बिस्तारै तलतिर खस्न शुरु भइ काउन्ट डाउन शुरु हुन्छ ।

प्रतिकृया दिनुहोस