संविधानसभाले सहमतिका लागि दिएको अन्तिम दिन बसिरहेको संवैधानिक राजनीतिक सम्वाद तथा सहमति समितिको बैठक छाडेर एमाओवादी अध्यक्ष पुष्पकमल दाहालले मोर्चाको बैठक बोलाएका छन् ।

दाहालले आकस्मिक बैठक भन्दै सिंहदरवारस्थित एमाओवादी संसदीय दलको कार्यालयमा ३० दलीय मोर्चाको बैठक बोलाएका हुन् । जनकपुरमा बन्द गर्ने क्रममा आन्दोलनकारीको निधन भएपछि त्यसबारे छलफल गर्न भन्दै बैठक बोलाएका हुन् ।

दाहालले आफ्नो भनाई सम्वाद समितिमा राखेर मोर्चाको बैठकतिर लागेका छन् । दाहालसँगै मोर्चामा आवद्ध अन्य नेताहरु पनि सम्वाद समितिको बैठकबाट बाहिरिएका छन् ।

तर, दाहालका स्वकीय सचिव चुडामणी खड्काले मोर्चाको बैठक सक्नासाथ सम्वाद समितिको बैठकमा जाने बताए । उनले भने, ‘‘हाम्रा नेताहरु सम्वाद समितिमा छन्, मोर्चाको बैठक सक्नासाथ पुनः सम्वाद समितिको बैठकमा जाने कार्यक्रम छ ।’’

अहिले पनि सम्वाद समितिकाे बैठक जारी छ । तर, दाहाल बाहिरिएपछि एमालेका अध्यक्ष केपी अाेली पनि बैठकबाट बाहिरिएका छन् ।

उनी नियमित स्वास्थ्य जाँच गर्न भन्दै शिक्षण अस्पताल महाराजगञ्ज गएका छन् । बैठकमा प्रधानमन्त्री एवम् कांग्रेस सभापति काेइराला पनि छैनन् ।

प्रतिकृया दिनुहोस