प्रधानमन्त्री सुशील कोइरालाले युरोपेली संघको प्रतिनिधिमण्डलसँगको कुराकानीमा देशको हित नचिताउने एमाअाेवादी लगायतका राजनीतिक दलका कारण ८ माघमा संविधान अाउन नसकेकाे बताएका छन् ।

संघका राजदूत रेन्चे टिरिङको नेतृत्वमा आएका नेपालका लागि बेलायत, डेनमार्क, जर्मनी, फ्रान्स, फिनल्यान्ड, नर्वे र स्वीजरल्यान्डका राजदूतसँग प्रधानमन्त्री निवास बालुवाटारमा भएको भेटमा प्रधानमन्त्री कोइरालाले यस्तो बताएका हुन् ।

भेटका क्रममा उनले भने, “संविधान निर्माणको प्रक्रिया अगाडि बढेको छ,  केही राजनीतिक दल देश र जनताको बृहत्तर हितमा लचक हुन नसक्दा ८ माघमा संविधान ल्याउन गरिएकाे सहमतिकाे प्रयास सार्थक परिणाममा पुग्न सकेन ।”

भेटवार्ता नेपालको राजनीतिक स्थिति, संविधान निर्माणको अवस्था, नेपाल र युरोपेली सङ्घबीचको राजनीतिक सहयोगलगायत विषयमा केन्द्रित भएको उनका प्रेस सहयोगी प्रकाश अधिकारीले बताए ।

काेइरालाले विगत सात वर्षदेखिको निरन्तर प्रयास भए पनि सहमतिमा कायम गर्न नसकेकाले प्रक्रियामा जानुपरेको बताए । उनले बाध्यताले प्रक्रियामा जानुपरे पनि प्रक्रिया आफैंमा प्रजातान्त्रिक विधि भएकाे बताए ।

“वार्ताको प्रयास छाडिएको छैन”

भेटमा प्रधानमन्त्री कोइरालाले भइसक्न लागेको सहमति केही दलको अनावश्यक अडानले अन्तिम क्षणमा बिग्रेको बताउँदै भने, “प्रक्रियाको कुरा गरे पनि सहमति, सहकार्य, एकता मेलमिलाप र वार्ताको प्रयास छाडिएको छैन ।”

काेइरालाले भने, “म आफैं गेट क्र्यास गरेर एमाओवादी अध्यक्ष पुष्पकमल दाहाललाई भेटन गएको छु ।”

प्रतिकृया दिनुहोस