तस्वीर सौजन्यः रिपोर्टर्स क्लब

प्रधानमन्त्री सुशील कोइरालाले संविधानसभाबाट अघि बढेको संविधान निर्माण प्रक्रिया कसैले पनि रोक्न नसक्ने बताएका छन् । २० माघमा रिपोर्टर्स क्लबको ज्ञापनपत्र बुझ्ने क्रममा उनले संविधानसभाले गठन गरेको समिति रोक्ने अधिकार कसैसँग नभएको बताएका हुन् ।

“‘वार्ताका लागि गेट क्र्यास गरेर प्रचण्डजीकोमा गएँ, तर उहाँले प्रस्ताव निर्माण समिति खारेज गर्नुपर्ने शर्त राख्नुभयो,” उनले भने, “संविधानसभाले गठन गरेको समिति रोक्ने म को हुँ ? प्रक्रिया संविधानसभाले शुरु गरेको हो, मैले होइन, मैले रोक्न सक्दिन, प्रक्रिया रोक्ने कसैसँग अधिकार छैन ।”

प्रधानमन्त्री कोइरालाले ससर्त वार्ता बस्न नसकिने स्पष्ट पारे । “प्रचण्डजीले मसँग प्रस्ताव निर्माण समिति खारेज गर्नुपर्छ भन्नुभयो, किन खारेज गर्ने ? म ससर्त वार्तामा बस्दिन,” उनले भने ।

उनले अब प्रक्रियामै गएर भए पनि संविधान जारी गरेरै छाड्ने उनले बताए । उनले भने, “सहमतिको राजनीतिबाट म पछि हट्दिन, तर त्यसका लागि प्रक्रिया रोक्ने शर्त मान्न सकिँदैन ।”

संविधानसभा छाडेर गए एमाओवादीलाई जनताले नै घेर्ने प्रधानमन्त्रीको भनाइ छ । “उहाँहरु वार्तामा नआए कहाँ जाने ? आन्दोलनमा जाने ? द्वन्द्वमा जाने ? बन्दुक बोक्न जाने ?” उनले थपे, “संविधानसभा छाडेर गए एमाओवादीलाई जनताले नै घेर्नेछ ।”

प्रतिकृया दिनुहोस