एमाओवादी अध्यक्ष पुष्पकमल दाहालले बृहत्त शान्ति सम्झौता र मधेश सम्झौता बिरोधीहरु नेपाली कांग्रेस र नेकपा एमालेको नेतृत्वमा पुगेकाले संविधान निर्माणमा गतिरोध आएको दाबी गरेका छन् । जनकपुरको एक होटेलमा २५ माघमा संचारकर्मीसँग कुराकानी गर्दै उनले कांग्रेस सभापतिसमेत रहेका प्रधानमन्त्री सुशील कोइराला १२ बुँदे समझदारीबाट खुशी नभएका र एमाले अध्यक्ष केपी शर्मा ओली जनआन्दोलन बिरोधी भएकाले उनीहरु ती सम्झौता उल्टाउन लागिपरेको आरोप लगाए ।

“उनीहरु अहिले पावरमा आएका छन्, त्यसैले ऐतिहासिक सम्झौताहरु उल्टाउनतिर उद्दत भएका छन्,” दाहालले भने । उनले मधेशको अस्तित्व नै स्वीकार नगर्ने र जनआन्दोलनलाई बयलगाडा चढेर अमेरिका पुग्ने टिप्पणी गरेका ओली आन्दोलनबाट प्राप्त उपलब्धि र संघीयताको रक्षा गर्नै नसक्ने बताए ।

उनले प्रस्ताव निर्माण समिति भन्दा पनि सत्तापक्षीय दलहरुको पेलेर जाने सोच संविधान निर्माणको प्रमुख बाधक रहेको दाहालको भनाइ छ । उनले विगतमा भएका सम्झौताहरुको सम्मान गर्ने, सम्झौताको मर्म बमोजिम संविधान लेखन अगाडि बढाउने र आन्दोलनका सहयात्रीहरुको सहमतिबाट संविधान बनाउने दृढ आए संविधान निर्माणका सबै समस्या समाधान हुने दाबी गरे ।

ईश्वरचन्द्र झा, जनकपुर

प्रतिकृया दिनुहोस