अनशनरत प्राध्यापक डा.गोविन्द केसीको स्वास्थ्य नाजुक हुँदै गएको उनको उपचारमा संलग्न चिकित्सकले बताएका छन् ।

अनशनको आठौं दिन १५ चैतमा डा. केसीको रगतमा इलेक्ट्रोलाइट्सको कमी देखिएको, एसिडोसिस (शरीरमा अम्लिय पना बढ्ने) भएको र बेलाबेला भ्रान्ती हुने (डिसओरिएन्टेशन) समस्या देखिएको उपचारमा संलग्न डा. दिव्यासिंह शाहले जानकारी दिइन् ।

त्यसैगरी छाती, टाउको र मांशपेशीको दुखाई पनि बढदै गएको र कुनै पनि बेला स्वास्थ्यस्थिति निकै जटिल बन्नसक्ने अवस्था भएको शाहले बताइन् ।

‘सरकारी वार्ता टोलीले नाडी छाम्ने काममात्रै गर्‍यो’
सरकारद्वारा गठित वार्ता टोलीले अनशनरत डा. केसीसँग विना पूर्वतयारी वार्ता गर्न आएको र ‘नाडी छाम्ने’ काम गरेको डा. केसीका तर्फबाट वार्ताका लागि खटिएका प्रतिनिधिहरुले बताएका छन् ।

“न कुनै तयारी, न उनीहरुसँग कुनै अधिकार नै छ, आएर एकसरो कुरामात्रै गरेका छन्, उनीहरुको कुरा गराईै नाडी छामेजस्तो मात्रै छ,” डा. केसीका प्रतिनिधि डा. जीवन क्षेत्रीले भने ।

उनले विगतमा जस्तो कार्यान्वयन नहुने कागजी सहमतिमा डा. केसीले अनशन नतोड्ने जानकारी दिए । “प्रोफेसर केसीले उठाएका मागमध्ये सरकारले तत्कालै कार्यान्वयन गर्नसक्ने माग कार्यान्वयनमा लैजाओस, त्यसपछि नीतिगत विषयमा छलफल गरौंला भन्नुभएको छ,” डा. क्षेत्रीले भने ।

केसीका तर्फबाट शिक्षण अस्पतालका चिकित्सक प्राडा वाइपी सिंहको संयोजकत्वमा डा. रामचन्द्र सापकोटा, डा. जीवन क्षेत्रीलगायतको वार्ता टोली खटिएको छ ।

“विगतमा पनि सरकारले कागजी सम्झौता गरेर कार्यान्वयनमा नगरेकाले यस्तो अवस्था आएको हो, यसपटक प्रोफेसर तुरुन्त कार्यान्वयन हुनसक्ने माग कार्यान्वयन नहुँदासम्म अनशन तोड्ने मनस्थितिमा हुनुहुन्न,” क्षेत्रीले जानकारी दिए ।

भोली १६ चैतमा वृहद् प्रदर्शन
भोली १६ चैतमा आन्दोलनरत चिकित्सक, रेजिडेन्ट डाक्टर, नागरिक समाज र डा. केसीका समर्थकहरु संलग्न जुलुशले डा. केसीको समर्थनमा प्रदर्शन गर्ने भएको छ ।

विहान १० बजे शिक्षण अस्पतालमा भेला भई जुलुश प्रधानमन्त्रीको सरकारी निवास बालुवाटरसम्म पुग्ने कार्यक्रम रहेको एमबीबीएस स्टुडेन्ट सुमन आचार्यले जानकारी दिए ।

उनले डा. केसीको सत्याग्रहलाई समर्थन गर्दै माग पूरा गराउन सरकारलाई दबाब दिनका लागि उपस्थित भइदिन सबैलाई अपिल समेत गरेका छन्।

प्रतिकृया दिनुहोस