आम हड्ताल फिर्ता लिएका ३० दलीय मोर्चाकाे प्रमुख घटक मधेशी जनाधिकार फोरम लोकतान्त्रिकका महासचिव रामजनम चौधरी सडक आन्दोलन नभई संविधानसभाबाट संविधान बनाउनुपर्ने बताउँछन् । हिमालखबरसँग उनले भने, ‘‘सडक आन्दोलनको औचित्य छैन ।’’

२७ चैतमा बोलाइएको ३० दलीय मोर्चाको बैठक के कारणले बस्न नसकेको हो ?
मोर्चाका कतिपय दलका प्रमुख नेताहरु आफु बैठकमा नआउने तर, पछि निहुँ खोज्ने गर्छन् । आज पनि ती नेताहरु बैठकमा नआएकाले स्थगित गरिएको हो । उहाँहरु आएपछि मोर्चाको बैठक बस्छ ।

बन्द फिर्ता लिएपछि उहाँहरु त बैठकलाई औचित्यहिन भन्दै हुनुहुन्छ ?
त्यो आफ्नो हैसियत नबुझ्ने नेताहरुले भनेका हुन् । आफू मोबाइल अफ गरेर बस्ने । दोस्रो, तेस्रो तहका नेताहरु बैठकमा पठाएर बाहिर निहुँ खोज्नुको अर्थ छैन ।

तर, मधेशी जनाधिकार फोरम नेपालका अध्यक्ष उपेन्द्र यादव त एमाओवादीसहितको मोर्चाबाट छुुट्टिने कुरा गर्दै हुनुहुन्छ नि ?
उपेन्द्र यादवसँग आन्दोलन गर्ने आधार के छ ? जब आन्दोलनको औचित्य छैन भने त्यस्तो आन्दोलन किन गर्ने ? सत्तापक्षले संविधानसभाको बैठक लामो समयदेखि स्थगित गरेर सहमति गरौं भन्दैछ भने हामीले आन्दोलन भन्नु हुँदैन ।

उपेन्द्र यादवले मधेशी मोर्चालाई सक्रिय बनाउने कुरा गर्दै हुनुहुन्छ नि ?
कसैलाई रहर लाग्छ भने मोर्चाबाट बाहिरिए केही फरक पर्दैन । उपेन्द्र यादव एक्लै आन्दोलन गर्छु भन्नुहुन्छ भने भन्नु केही छैन । तर, मधेशी मोर्चा सहमतिबाट संविधान बनाउने पक्षमा छ ।

त्यसोभए मधेशी मोर्चा पनि फुट्छ ?
अजेण्डा उठाउने कुरामा मधेशी मोर्चा पहिलेदेखि नै एक छ । तर, कसैलाई रहर लाग्छ भने के गर्ने र ।

के अव तपाईहरु आन्दोलन छाडेर संविधानसभाबाटै संविधान बनाउने पक्षमा लाग्नुभएको हो ?
हामी पहिलेदेखि नै संविधानसभाबाट संविधान बनाउने पक्षमा छौं । आन्दोलन सहमतिका लागि दबाब दिनका लागि मात्रै हो । अहिले सहमतिका लागि छलफल भइरहेको छ । संविधानसभाबाटै संविधान बनाउने हो ।

अनि, कांग्रेस–एमालेसँग छलफल कहाँ पुग्यो ?
मोर्चाको संयोजकको हैसियतमा एमाओवादीका अध्यक्ष पुष्पकमल दाहालले अनौपचारिक छलफल गरिरहनुभएको छ । आशा गरौं चाँडै औपचारिक बार्ताबाट सहमतिमा संविधान बन्नेछ ।

प्रतिकृया दिनुहोस