नेपाली खेलाडीलाई पछ्याउँदै इरानी खेलाडी

चौध वर्षमुनि महिला खेलाडी सम्मिलित एएफसी यु–१४ गर्ल्स रिजनल च्याम्पियनसिपको सेमिफाइनल खेलमा नेपालले भारतसँग प्रतिस्पर्धा गर्ने भएको छ ।

समूह ‘ए’ को विजेता नेपालले समूह ‘बी’ को उपविजेता भारतसँग दशरथ रङ्गशालामा ११ वैशाख, शुक्रबार दिउँसो १ बजे प्रतिस्पर्धा गर्नेछ ।

समूह चरणमा तीन खेल खेलेको नेपालले तीनै खेलमा जित हासिल गर्दै नौ अङ्क जोडेको छ । नेपालले पहिलो खेलमा इरानलाई ३–२ गोलअन्तरले पराजित गरेको थियो । दोस्रो खेलमा माल्दिभ्सलाई १०–० र तेस्रो तथा अन्तिम खेलमा श्रीलङ्कामाथि ८–० को फराकिलो गोलअन्तरले विजय हासिल गरेको थियो । नेपालले जारी प्रतियोगितामा २१ गोल गरेको छ ।

दशरथ रंगशालामै शुक्रबार हुने दोस्रो सेमिफाइनल खेलमा समूह ‘बी’ का विजेता बङ्गलादेशले समूह ‘ए’ को उपविजेता इरानसँग दिउँसो ४ बजे भिड्नेछ ।

प्रतियोगितामा बङ्गलादेश भुटानलई १६–० गोलअन्तरले पराजित गर्दै सेमिफाइनलमा प्रवेश गरेको हो भने इरानले माल्दिभ्सलाई १८–० गोलअन्तरले पराजित गर्दै सेमिफाइनलमा आफ्नो स्थान सुरक्षित गरेको हो ।

सात राष्ट्रले भाग लिएको प्रतियोगितामा माल्दिभ्स, श्रीलङ्का र भुटान प्रतियोगिताबाट बाहिरिइसकेका छन् ।

प्रतिकृया दिनुहोस