विनाशकारी भूकम्पमा परी १२ वैशाखमा मृत्यु भएका तनहुँ जामुने– ७, धयरे निवासी नेपाली सेनाका गुल्मपति ३४ वर्षीय विनोद श्रेष्ठको गाउँ यतिबेला शोकमा डुबेको छ ।

श्रेष्ठको मृत्युको खबरले यतिबेला जामुने गाविसको पसले, धयरे, कोइरालाथोक, बडहरे, गङ्गटे, कुरिनचौरलगायतका क्षेत्र शोकमा डुबेका छन् । छोराको मृत्युको खबर सुनेपछि ६० वर्षीया आमा नरमाया श्रेष्ठ बेहोस भएकी छन् ।

सैनिक बन्दोबस्ती अड्डा काठमाडौँंमा गुल्मपतिमा कार्यरत श्रेष्ठको गोङ्गबुमा घरले किचेर मृत्यु भएको थियो । उक्त दिन किनमेलका लागि बाहिर निस्कन लागेका श्रेष्ठलाई घर भत्केर माथिबाट खसेको ढुङ्गामाटोले च्यापेको थियो ।

सन् २०५९ मा श्रेष्ठले सेकेन्ड लेफ्टिनेन्ट पदबाट सेनामा जागिर सुरु गरेका थिए । श्रेष्ठले गत चैतमा मात्रै सैनिक कमाण्ड स्टाफ कलेज तहको सेनाको कठिन मानिने कोर्शसमेत पूरा गरेका थिए ।

श्रेष्ठको लाश नेपाली सेनाको हेलिकोप्टरमा १६ वैशाखमा घरमा ल्याइएपछि उनको परिवारलाई सान्त्वना दिन आफन्तजन, छिमेकी, शुभेच्छुक, साथीभाइको घुइँचो लागेको छिमेकी शिवकुमार श्रेष्ठले बताए ।

मृतक गुल्मपति अविवाहित थिए। उनका बुबाको केही समयअघि नै मृत्यु भइसकेको छ । तीन दाजुभाइमध्ये श्रेष्ठ कान्छा हुन् ।

प्रतिकृया दिनुहोस