नुवाकोटको ओखरपौवा मावि

१२ वैशाखमा गएको विनाशकारी भूकम्पका कारण ३६ जिल्लाका ५७५ विद्यालय पूर्णरुपमा ध्वस्त भएका छन् ।

शिक्षा विभागका अनुसार भूकम्पबाट ५७५ विद्यालयमा पूर्ण र ९६९ विद्यालयमा आंशिक क्षति पुगेको छ ।

भूकम्पका कारण सिन्धुपाल्चोकमा १२ शिक्षकको मृत्यु भएको छ भने ४,११३ कक्षाकोठा पूर्णरुपमा क्षतिग्रस्त भएका छन् । यस्तै, २६० वटा विद्यालय आंशिक रुपमा क्षतिग्रस्त छन् ।

नुवाकोटमा ८ शिक्षक र ३६ विद्यार्थीको मृत्यु भएको छ भने ९७ विद्यालय पूर्णरुपमा ध्वस्त र ३९० आंशिक रुपमा भत्केका छन् ।

भूकम्पले रसुवाका १० विद्यार्थीको मृत्यु भएको छ भने ४३ विद्यालय ध्वस्त भएका छन् । धादिङमा छ विद्यार्थी र पाँच शिक्षकको मृत्यु भएको छ ।

यसैगरी, गोरखामा चार शिक्षकको मृत्यु भएको छ र १,६५३ कक्षाकोठा पूर्ण रुपमा क्षतिग्रस्त छन् ।

यस्तै, काभ्रेमा दुई विद्यार्थीको मृत्यु र ५९ विद्यालयमा पूर्णरुपमा क्षतिग्रस्त, सोलुखुम्बुका ५० विद्यालय भवन पूर्णरुपमा क्षतिग्रस्त, रामेछापका २० विद्यालय र आंशिक २४० वटा विद्यालय, दोलखामा पूर्ण रुपमा ५६ विद्यालय, लमजुङमा २० विद्यालय पूर्णरुपमा, तनहुँमा २५ विद्यालय पूर्णरुपमा र १५० आंशिक रुपमा, भोजपुरमा १० विद्यालय पूर्णरुपमा र एक सय विद्यालय आंशिक रुपमा क्षतिग्रस्त भएका छन् ।

काठमाडौँमा ८ विद्यालयका १०० कक्षाकोठा, ललितपुरमा ९ विद्यालयका ५०१ कक्षाकोठा र भक्तपुरको १ विद्यालय र ५० कक्षाकोठामा क्षति पुगेको छ ।

भक्तपुर र ललितपुरका ९९ प्रतिशत विद्यालय र काठमाडौँका ९० प्रतिशत विद्यालयलाई भूकम्पपीडितका लागि सेल्टरका रुपमा प्रयोग गरिएको छ ।

भूकम्पका कारण बन्द गरिएका विद्यालय आगामी १ जेठदेखि सञ्चालन हुने भएका छन् । रासस

प्रतिकृया दिनुहोस