थप समाचारसोमबार, बैशाख २८, २०७२
हामीबाट हरसम्भव सहयोग हुनेछ: जापान
नेपालका लागि जापानका राजदूत मासाशी ओगावाले गत वैशाख १२ गतेको विनाशकारी भूकम्पले नेपालमा पुर्याएको क्षतिको पुनःस्थापना र पुनःनिर्माणका लागि जापान सरकारले हरसम्भव सहयोग गर्ने बताएका छन् ।
राजधानीको चाबहिल चुच्चेपाटीमा जापानी सेनाद्वारा स्थापित स्वास्थ्य शिविरको निरीक्षणका क्रममा राजदूत ओगावाले भने, “हामी यस विपत्तिलाई सामना गर्ने क्रममा नेपालको महत्वपूर्ण साझेदार बन्न र त्यहीअनुसारको भूमिका निर्वाह गर्न तयार छौं ।”
उनले भूकम्पबाट प्रभावित क्षेत्रको पुनःनिर्माणका लागि समय र स्रोतसाधन दुवै अत्यावश्यक रहेको बताउँदै जापान सरकारले आफ्नो विज्ञता र दक्षता दुवै प्रयोग गरी नेपाललाई सक्दो सहयोग गर्ने बताए ।
राजदूत ओगावाले नेपाल सरकारले राष्ट्रिय योजना आयोगको अगुवाइमा विपद्पछिको आवश्यकता मूल्याङ्कनको कार्य गरिरहेकाले त्यसको नतिजाका आधारमा सहयोगको स्वरुप निर्धारण हुने स्पष्ट पारेका थिए ।
रासस