थप समाचारमंगलबार, बैशाख २९, २०७२
मंगलबारको भूकम्पका कारण ८ को मृत्यु, पराकम्प आउने क्रम जारी
२९ वैशाख दिउँसो १२ः५० बजे गएको ७.३ म्याग्निच्युडको ठूलो भूकम्प लगत्तै ५ म्याग्निच्यूडभन्दा माथिका पाँचवटा पराकम्प गएका छन् ।
ललितपुर हुलाकका कर्मचारी धनप्रसाद चौलागाइँका अनुसार दोलखाको भिमेश्वर नगरपालिका– ५ स्थित घरमा रहेका उनका काका चित्रबहादुर चौलागाई र काकीको पनि मृत्यु भएको छ ।
सिन्धुपाल्चोकमा ४ जनाको मृत्यु भएको चौताराका स्थानीय निर्मलकुमारले जानकारी दिएका छन् । त्यस्तै काठमाडौंमा दुई जनाको निधन भएको छ ।
काठमाडौंको टेकुमा एकजनाको पर्खाल भत्कदा परेर मृत्यु भएको प्रहरीले जनाएको छ त्यसैगरी सुन्दरीजलमा पनि एकको मृत्यु भएको छ ।
प्रहरीको प्रारम्भिक रिपोर्ट अनुसार भूकम्पले गर्दा काठमाडौंमा ७३ ललितपुरमा ७३ र भक्तपुरमा ३२ जना घाइते भएका छन्। सिन्धुपाल्चोकमा १०० जना भन्दा बढी घाइते भएका छन्।
त्यस्तै सीतापाईलास्थित एउटा चार तले घर पूरै ध्वस्त भएको थाहा भएको छ भने काठमाडौंको साँखु क्षेत्रमा धेरै घरहरु भत्किएको जानकारी आएको छ । नयाँ बजारमा पनि ४ तले घर लडेको छ । उक्त घरले मोटरसाइकलमा सवार एक व्यक्ति र केही बटुवाहरुलाई पुरेको र स्थानीयको अनुमान छ । त्यहाँ सेना र प्रहरी उद्धारमा खटिइसकेका छन् ।
सोलुखुम्बुका प्रमुख जिल्ला अधिकारी झकनाथ ढकालका अनुसार सोलुखम्बुमा पनि ठूलो संख्यामा घरहरु भत्किएका छन् । “सदरमुकाम सल्लेरीका धेरै घरहरु ढलेको हामीले देखिराखेका छौं, क्षतिको विवरण भने आएको छैन,” ढकालले भने ।
दोलखाको बोच गाविसमा रहेकी अनेरास्ववियुकी केन्द्रिय सचिव भक्तकुमारी लामाका अनुसार चारै तिर धुलो उडिरहेको छ, तुवाँलो लागेजस्तो छ । रामेछापमा ठूलो पहिरो गएको देखिएको पनि उनले बताइन् ।
भूकम्प र त्यसपछिका पराकम्पनबाट त्रसित मानिसहरु काठमाडौंका सडक र खुल्ला स्थानमा जम्मा भएका देखिन्छन् । भूकम्पबाट दोलखा, रामेछाप, सोलुखुम्बु र सिन्धुपाल्चोकमा धेरै क्षति भएको अनुमान गरिएको छ ।