भूकम्पपीडितका लागि पर्सा हुँदै मुलक भित्रिने राहत सामाग्रीमा भन्सार छुटको समयावधि थप गरिएको छ ।

जिल्ला प्रशासन कार्यालय पर्साले २७ जेठमा पत्रकार सम्मेलन गरी ७ असारसम्म भन्सार छुटको व्यवस्था कायम गरिएको जानकारी दिएको हो ।

वीरगंज भन्सार र सुख्खा बन्दरगाहबाट भूकम्पपीडितका लागि भारतबाट ल्याइने राहतमा भंसार छुटको समयसीमा ७ असारसम्म कायम गरिएको तर, भन्सार छुटमा आएका त्यस्तो सामाग्री नेपाल सरकारको केन्द्रीय राहत संकलन केन्द्रमा बुझाउनुपर्ने पर्साका प्रमुख जिल्ला अधिकारी केशवराज घिमिरेले बताए ।

१२ वैशाखमा गएको महाभूकम्पपछि ल्याइने राहत सामाग्रीमा भन्सार छुटको अवधि पहिलो पटक १२ जेठसम्म तोकिए पनि पछिल्लो समय २५ जेठसम्म पु¥याइएको थियो ।

“भारतबाट अझै १२० ट्रक राहतका प्राविधिक सामान आउन बाँकी भएकोले समयसीमा थप गरिएको हो ।” प्रजिअ केशवप्रसाद घिमिरेले भने ।

घिमिरेका अनुसार वीरगंज भन्सार कार्यालय र सुख्खा बन्दरगाहबाट १४ बैशाखदेखि २० जेठसम्म १ हजार १३५ ट्रक राहत सामग्री देशका ३१ जिल्लामा पठाईसकिएको छ ।

वासस्थान निर्माण लगायत खाद्यान्न, औषधी र दैनिक उपभोग्य बस्तु समेत गरी ११९ थरिका सामानहरु राहतको रुपमा नेपाल आएको उनले जानकारी दिए ।

भूकम्पले पर्सामा २० जनाको मृत्यु
भूकम्पले पर्सा जिल्लाका २० जनाको मृत्यु भएको छ ।

प्रजिअ घिमिरेले भने “भूकम्प आउँदा आत्तिएर जिल्लामा ६ जनाको मृत्यु भएको छ । त्यसैगरी पर्साकै १२ जनाको राजधानीमा र २ जनाको चितवनमा मृत्यु भएको पुष्टी भएको छ ।”

उनका अनुसार भूकम्पबाट पर्सामा ५७ वटा सरकारी भवन र १२१ वटा विद्यालय भवनमा क्षति पुगेको छ । त्यस्तै ६ वटा मन्दिरमा भूकम्पले असर गरेको छ भने निजी भवन क्षति भएको भन्दै ४४९ वटा निवेदन परेका छन् ।
सुरेश विडारी पर्सा

प्रतिकृया दिनुहोस