नेपाली खेलकुदको इतिहासमा पहिलोपटक राष्ट्रिय खेलकुद परिषद् (राखेप)को सदस्य–सचिवमा सकुन्तला नगरकोटी नियुक्त भएकी छिन् ।

२०३१ मा कञ्चनपुरको पुनर्वासमा जन्मिएकी नगरकोटी निमित्त सदस्य–सचिवका रुपमा राखेप इतिहासमा पहिलोपटक नियुक्त भएकी हुन् । उनले आजै पदभार ग्रहण गर्दै खेलकुद क्षेत्रको विकास र विस्तारका लागि आफूले सक्दो प्रयास गर्ने प्रतिबद्धता व्यक्त गरिन् ।

“खेलकुदलाई माथि उठाउनका लागि खेलकर्मी, खेलसँग सम्बन्धित विभिन्न सङ्घ सङ्गठन, राजनीतिक दलका नेता सबै एकजुट भएर लाग्नुपर्छ”, उनले भनिन् । उनले महाभूकम्पका कारण अस्तव्यस्त भएको राष्ट्रपति रनिङ सिल्ड प्रतियोगिता तोकिएको समय आगामी असार ५ गते नै सञ्चालन हुने प्रतिबद्धता जनाइन् ।

सदस्य–सचिव नगरकोटी २०४६ मा कबड्डी र भलिबल खेलकी राष्ट्रिय खेलाडी थिइन् । २०५१ देखि खेलसँग सम्बन्धित विभिन्न खेलकुद सङ्घमा पदाधिकारीका रुपमा रही काम गरेकी उनी नेकपा एमाले डडेल्धुराको उपसचिव समेत हुन् ।

त्यस्तै राखेपका उपाध्यक्ष लामा टेण्डी शेर्पाले सदस्य–सचिव नगरकोटीलाई सफलताको शुभकामना दिँदै अहिलेको टिममा एकता भएको हुँदा खेलकुद क्षेत्रको विकासमा कुनै कमी नरहने बताए ।

प्रतिकृया दिनुहोस