३२ जेठमा राष्ट्रिय खेलकुद परिषद् (राखेप) को निमित्त सदस्यसचिव नियुक्त शकुन्तला नगरकोटी भन्छिन्, “शुरुमा खेलकुद विकास ऐन संशोधन गर्छु, अनि अरु योजना बनाउँछु ।”

राखेपको नेतृत्व तपाईंलाई दिनुको कारण के हो ?
२०४६ सालताका म कबड्डी र भलिबलको राष्ट्रिय खेलाडी थिएँ । त्यसपछि खेलकुदसँग सम्बन्धित विभिन्न संघ संस्थामा आवद्ध रहेर काम गरें ।

पछिल्लो एक वर्षयता राखेपकै सदस्यको भूमिकामा छु । मेरो कामलाई मूल्यांकन गरेरै जिम्मेवारी दिइएको हुनुपर्छ ।

तपाईंका योजना के के छन् ?
सबैभन्दा पहिले त परिषद्लाई पूर्णता दिनेछु । त्यसपछिको परिषद्को बोर्ड बैठकले विस्तृत योजना तय गर्नेछ । खेलकुद विकास ऐन संशोधनमा लाग्नेछु ।

समस्या ऐनमै हो कि व्यक्तिमा ?
कार्यविभाजन, पदाधिकारीको जिम्मेवारी, खेलाडीको सेवा सुविधा, एकेडेमी लगायतका विषयमा ऐन संशोधन गरिनै पर्छ । त्यसका लागि मस्यौदा बन्दैछ । अर्को कुरा चाहिं ऐनले सदस्यसचिवलाई तानाशाही बन्ने मौका दिएको छ । त्यसलाई कटौती गर्नुपर्नेछ ।

अघिल्लो सदस्यसचिवका पालामा थालिएका कामबारे के सोच्नुभएको छ ?
खेलकुद विकासका लागि गरिएका राम्रा कामलाई निरन्तरता दिनेछु । राजनीतिक स्वार्थ प्रेरित काम छन् भने त्यसलाई खारेज गर्छु ।

राखेपमा दलीय हस्तक्षेप नरोकिएसम्म मुलुकको खेल क्षेत्रको विकास कसरी होला ?
तपाईंको कुरासँग असहमत छैन । तर, सदस्यसचिवको नियुक्ति नै मन्त्रिपरिषद्बाट हुने भएपछि राजनीतिक प्रभाव देखिनु अस्वाभाविक पनि होइन ।

तर खेल क्षेत्र बुझेको मान्छे हुने हो भने फरक नपर्ला । मेरै कुरा गर्नुहुन्छ भने म खेलाडी पृष्ठभूमिबाटै आएकी हुँ । मेरो ध्यान अन्यत्र छैन ।

प्रतिकृया दिनुहोस