नेकपा एमालेले स्वदेशी तथा विदेशी पर्यटकलाई स्वागत गर्न विषेश कार्यक्रम गर्ने भएको छ ।

राष्ट्रिय स्वयम् सेवक अभियानअन्तर्गत ८ असारमा देशभरका पर्यटकीय केन्द्र या पदमार्गमा पार्टी नेताको उपस्थितिमा स्वदेशी÷विदेशी पर्यटकलाई स्वागत सत्कारलगायत विशेष कार्यक्रम गर्ने भएको हो ।

कार्यक्रमको तयारीका सन्दर्भमा पार्टीको केन्द्रीय कार्यालयमा आयोजित कार्यकर्ता भेलामा स्वदेशी÷विदेशी पर्यटकलाई स्वागत सत्कार, पर्यटकीय सम्पदाको सरसफाइ एवम् भूकम्पले सीमित क्षेत्रमा क्षति पु¥याएको भए पनि नेपाल पर्यटनका लागि सुरक्षित छ भन्ने सन्देश दिने जानकारी दिइयो । कार्यक्रमलाई सफल पार्न पर्यटन सम्बद्ध सबै सङ्घसंस्थालाई एमालेले आग्रह गरेको छ ।

अभियानअन्तर्गत काठमाडौँ उपत्यकामा वसन्तपुरबाट पदयात्रासहित ठमेलमा पुगी कन्सर्ट ९सांस्कृतिक कार्यक्रम० हुनेछ ।
काठमाडौं बाहिर कञ्चनजङ्गा, हलेसी, जनकपुरधाम, सौराहा, पोखरा, लुम्बिनी, खप्तड, रारा, जोमसोम, ठाकुरद्वारालगायतका पर्यटकीय केन्द्रमा विशेष कार्यक्रम गरिनेछ ।

काठमाडौँको ठमेलमा हुने कार्यक्रममा अध्यक्ष केपी शर्मा ओलीले सम्बोधन गर्ने र अन्य स्थलमा प्रमुख नेताहरुलाई जिम्मेवारी दिइएको एमाले केन्द्रीय पर्यटन विभागका प्रमुख सूर्य थापाले बताए। यस्तै कञ्चनजङ्गामा उपाध्यक्ष वामदेव गौतम र जनकपुरमा माधवकुमार नेपाल जानेछन् ।

‘हाम्रो सम्पदा हाम्रो पहिचान, पर्यटकलाई गर्छौ सम्मान’ भन्ने नाराका साथ हुने कार्यक्रमको तयारीका लागि राष्ट्रिय पर्यटन व्यवसायी सङ्गठन र पर्यटन इलाका कमिटीले संयुक्त टोली बनाई तयारी गरेका छन् ।

अभियानका संयोजक एवम् पार्टीका सचिव गोकर्णराज विष्टले राष्ट्रिय विपद्का बेला सबै जातजाति, भाषाभाषी, धर्म, संस्कृति र भूगोलका जनताबीच अभूतपूर्व राष्ट्रिय एकताभाव निर्माण गरेको बबताए ।

पार्टीका अर्का सचिव योगेश भट्टराईले पर्यटन उद्योगमा गम्भीर नकारात्मक प्रभाव पार्ने काम हुन नदिन सांस्कृतिक कार्यक्रम पनि आयोजना गर्न लागिएको बताए ।

अभियानअन्तर्गत गत ३१ जेठदेखि स्वयम्सेवकबाट संस्कृति, पर्यटन तथा नागरिक उडड्यन मन्त्रालयसँगको समन्वयमा वसन्तपुर दरबार क्षेत्रमा क्षतिग्रस्त काष्ठमण्डपलगायत सांस्कृतिक संरचनाका मूल्यवान् काष्ठकला समेतका सामग्रीलाई सुरक्षित व्यवस्थापन गरिएको थियो । रासस

प्रतिकृया दिनुहोस