पूर्वक्षेत्रीय ट्रफिक प्रहरी कार्यालय इटहरीले दिएको जानकारी अनुसार सडक दुर्घटनाबाट पूर्वाञ्चलमा दुई दिनमा सरदर तीन जनाको ज्यान गइरहेको छ भने दैनिक घाइते हुने करिब ८ जनामध्ये ३ जना सिकिस्त घाइते हुने गरेका छन् ।

ज्यान गुमाउनेमध्ये ८० प्रतिशत १६—४० उमेर समुहका छन् । दुर्घटनामा भएको धनमाल नोक्सानीको लेखाजोखा छैन ।

सामान्यतया सडक दुर्घटनाबाट बढी क्षति चाडबाडको समयमा भइरहेको देखिन्छ । गएको असोजमा मात्र पूर्वाञ्चलमा भएका ६१ वटा सडक दुर्घटनामा ४५ जनाको ज्यान गएको थियो भने २३७ जना घाइते भएका थिए ।

गत चार वर्षको तथ्याङ्क विश्लेषणका अाधारमा क्षेत्रीय ट्राफिक प्रहरी कार्यालय इटहरीले उक्त जानकारी दिएको हो ।

पक्की, ग्राभेल र कच्चीसमेत गरी कुल ६ हजार ५४० किलोमिटर सडक भएको पूर्वाञ्चलमा ३ लाख २१ हजार २८९ वटा सवारी दर्ता छन् ।

क्षेत्रभरमा एकजना ट्राफिक प्रहरीले २५ दशमलब १५ किलोमिटर सडकको सवारी अनुगमन र नियमन गर्नु पर्छ भने एकजना ट्राफिक प्रहरीको भागमा १ हजार २३५वटा सवारी साधन पर्ने गरेको क्षेत्रीय ट्राफिक प्रहरी कार्यालय इटहरीले जनाएको छ ।

नेपालमा दर्ता भएका बाहेक भारतको सिक्कम, पश्चिम बंगाल र बिहारका सवारीसाधन पनि पूर्वाञ्चलमा सराबरी गुडने भएकोले ट्राफिक नियमनमा भार थपिएको क्षेत्रीय ट्राफिक प्रहरी कार्यालय इटहरीका प्रमुख प्रहरी उपरिक्षक नरबहादुर केसी बताँउछन् ।

गोपाल गडतौला, झापा

प्रतिकृया दिनुहोस