लागुऔषध कोरेक्स र रेस्काप नेपाल ल्याई बिक्री गर्ने भारतीय गिरोहका तीनसहित चार जना अभियुक्त झापाबाट पक्राउ परेका छन् ।

भारत बिहारको किसनगञ्ज जिल्ला, थाना दिघलबैंकका अन्जर अन्सारी (१८), चन्दन राजबंशी (२४) , सनोजकुमार सिंह (१८) र झापा टाघनडुब्बा २ का कलिम अन्सारी (१८) लाई ३६० थान कोरेक्स र ९ बोतल रेस्काप सहित ९ असारमा पक्राउ गरिएको जिल्ला प्रहरी कार्यालय झापाले जनाएको छ ।

उनिहरुका साथबाट लागुऔषध ओसारपसारमा प्रयोग भएको बा १७ प २७२१ र बीआर ३७ बी ०९७८० द्य नम्बरको भारतीय र मोटरसाइकल समेत बरामद गरिएको छ ।

भारतबाट नेपाल भित्र्याइएको सो लागुऔषध टाघनडुब्बा २ का अन्सारीको घर अगाडिको गोठमा मकैको ढोडले छोपेर लुकाएको अवस्थामा बरामद गरिएको थियो ।

झापा सदरमुकाम चन्द्रगढीबाट करिब ५० किलोमिटर पश्चिम दक्षिणको खुल्ला सिमानाकाबाट लागुपदार्थको ओसारपसारको भएको प्रहरीले जनाएको छ ।

भारतमा रुघाखोकी जस्ता रोगका लागि निर्मित औषधी कोरेक्स र रेस्काप नेपालमा लागू औषधका अम्मलीले अत्यधिक रुपमा प्रयोग गर्न थालेपछि सरकारले ती औषधीलाई लागू औषधको कोटीमा राख्दै आयात र उत्पादनमा प्रतिवन्ध लगाएको छ ।
गोपाल गडतौला, झापा

प्रतिकृया दिनुहोस