कृषिमन्त्री हरिप्रसाद पराजुलीको राजिनामा माग्दै अनेरास्ववियुले आन्दोलन गर्ने भएको छ ।

महिलामाथि अभद्र व्यवहार गरेकाले उनको मन्त्रीबाट राजिनामा र पार्टी कार्बाहीको माग गर्दै आन्दोलन गर्ने अनेरास्ववियुका सचिव भक्तकुमारी लामाले बताइन् । उनका अनुसार १७ असार विहान भृकुटी मण्डपमा विरोध प्रदर्शन हुनेछ ।

यसपछि, प्रधानमन्त्री सुशील कोइराला र नेकपा एमालेका अध्यक्ष केपी शर्मा ओलीलाई ज्ञापनपत्र बुझाउने अखिलले तयारी गरेको छ । लामाले भनिन्, “सार्वजनिक ठाउँमा महिलामाथि भएको अभद्र व्यवहारले मन्त्री पद र पार्टी विधानको खिल्ली उडाएको छ ।’’ उनले कार्बाही नभएसम्म विभिन्न आन्दोलन जारी राख्ने जनाएकी छिन् ।

१५ असारमा धान दिवसको अवसरमा आयोजित कार्यक्रममा मन्त्री पराजुलीले महिलामाथि अभद्र व्यवहार भएको भन्दै संसदमा समेत विरोध भएको थियो । तर, मन्त्री पराजुलीले भने आफुमाथि झुठो आरोप लगाएको बताएका छन् ।

मन्त्री पराजुली १६ असार दिउँसो गृहमन्त्री बामदेव गौतमलाई र पार्टी अध्यक्ष केपी शर्मा ओलीलाई भेटेका थिए ।

प्रतिकृया दिनुहोस