नेत्रविक्रम चन्द नेतृत्वको नेकपा माओवादीले पाँचथरको रानीगाउँस्थित निवुखोला लघु जल विद्युत उपभोक्ता समितिसँग चन्दा माग गर्दै धम्कीपूर्ण पत्र पठाएको छ ।

नेकपा माओवादीका पाँचथर जिल्ला सचिव अर्जुन घिमिरे र ‘जनमुक्ति सेना’ प्रमुख विमर्शको हस्ताक्षर रहेको पत्रमा चन्दा नदिए काम बन्द गर्नुपर्ने धम्कीपूर्ण पत्र प्राप्त भएपछि आयोजनाको काम ठप्प भएको छ ।

रानीगाउँ– १ स्थित आयोजनास्थलमा मोटरसाइकलमा पुगेका दुई माओवादीले पत्र थमाउँदै चन्दा नदिए काम रोक्न २२ असारमा धम्की दिएको उपभोक्ता समिति अध्यक्ष नरेन्द्र कार्कीले जनाकारी दिए ।

उनीहरुले चन्दा नदिने र काम पनि नरोक्ने हो भने निर्माण व्यवसायी, उपभोक्ता समितिका पदाधिकारीसँगै कामदारलाई समेत अपहरण गर्ने धम्की दिएका थिए ।

“दशवर्षे जनयुद्ध, जनसेना, जनअदालत, जनताका अधिकार संस्थागत गर्न र जनतालाई मुक्तिको निरन्तरताका लागि हामीले तपाइँको सँस्था मार्फत सहयोगको अपेक्षा गरेका हौं,” पत्रमा भनिएको छ ।

उक्त योजनाका ठेकेदार र उपभोक्ता समितिले आफ्नो पार्टीलाई वेवास्ता गरेको हुँदा तत्काल काम वन्द गरी समन्वय गरेर मात्रै काम गर्न धम्की दिइएको र बेवास्ता गरे त्यसवाट हुने क्षतिको जिम्वेवारी पनि समितिले नै लिनुपर्ने उल्लेख पत्रमा उल्लेख छ ।

जिल्ला विकास समितिको सहयोगमा निर्माण शुरु भएको आयोजनाको काम २५ असारभित्रै सम्पन्न गर्ने लक्ष्य लिइएकोमा माओवादी अवरोधका कारण समयमा काम सकिने सम्भावना नरहेको उपभोक्ता समितिको भनाई छ ।

पाँचथर माओवादीले भने पार्टी सुदृढिकरणका लागि आर्थिक सहयोग मागेको र यो अभियान मुलुकभर सञ्चालन भइरहेको जनाएको छ ।

पाँचथरका प्रमूख जिल्ला अधिकारी पुरुषोत्तम घिमिरेले माओवादीले गरेको पत्राचारवारे आफुलाई जनाकारी नभएको भन्दै यस्तो भएको पाइए कार्वाही गरिने प्रतिक्रिया दिए ।

लक्ष्मी गौतम, पाँचथर

खोटाङमा सरकारी कार्यालमा पनि चन्दा मागियो

यस्तै नेकपा माओवादी चन्द समूहले खोटाङका सरकारी कार्यालयहरुमा पनि चन्दाको लागि उर्दी जारी गरेको छ ।

माओवादीले जिल्लाका सबै कार्यालयमा पत्र पठाएर चन्दा माग गरेको हो । पार्टी महासचिव नेत्रविक्रम चन्दद्वारा हस्ताक्षरित पत्रमा रकम भने तोकिएको छैन ।

पत्र पठाइसकेपछि फोनबाट पनि चन्द माओवादीका कार्यकर्ताले फोनमा चन्दाका लागि ताकेता गरिरहेको कार्यालय प्रमुखहरु बताउँछन् ।

प्रमुख जिल्ला अधिकारी गोविन्द सापकोटाले सरकारी कार्यालयमा चन्दा माग्ने कसैलाई पनि चन्दा नदिन कार्यालय प्रमुखहरुलाई निर्देशन दिएको बताए ।

उनले भने, “कार्यालयको तर्फबाट चन्दा दिनु गैंरकानूनी काम हो, त्यसैले सबै कार्यालय प्रमुखहरुलाई बोलाएर चन्दा नदिन निर्देशन दिएको छु ।”

राष्ट्रियता, जनतन्त्र र जनजीविकाका विषयलाई स्थापित गर्न आन्दोलन गर्नुपर्ने भएकाले जिल्लास्थित केही सरकारी कार्यालय र गाविस सचिवसमक्ष सहयोग माग गरिएको माओवादी खोटाङका सचिव चन्द्रबहादुर बुढाथोकीले बताए ।

-योगिन राई, खोटाङ

प्रतिकृया दिनुहोस