लमजुङको बेसीशहरस्थित राष्ट्रिय बाणिज्य बैंकमा रकम दाखिला गर्ने क्रममा एक सेवाग्राहीको ५० हजार रुपैयाँ चोरी भएको छ ।

श्रीमञ्ज्याङ गाविसका सचिव मेघनाथ घिमिरेले गाविसको परियोजना र कर दाखिलामार्फत उठेको रकम रु २ लाख १६ हजार ८४० वाणिज्य बैंकमा जम्मा गर्न लाग्दा त्यसमध्ये रु ५० हजार गायब भएको हो ।

ब्यांकभित्रै रकम दाखिला गर्नै लाग्दा पछिबाट कसैले झोला तानेको अनुभव भएको र त्यसलगत्तै झोलाबाट ५० हजार गायब भएको उनले बताए ।

हजार–हजारका दुई बिटा र पाँच सयकको एक बिटा राखेको झोलाबाट पाँचसयको बिटो हराएको उनको भनाई छ ।

“गाविसको योजनाको पैसा अब कसरी तिर्ने ?’ उनले भने । रकम हराउने वित्तिकै उनले बैंकका प्रवन्धक ईन्द्रविलास न्यौपानेलाई र त्यसपछि स्थानीय प्रहरीलाई खबर गरेका थिए । प्रहरीले घटनाको अनुसन्धान थालेको छ ।

रकम हराएको भन्दै सचिव घिमिरेले हल्ला गरेलगत्तै बैंक बन्द गरेर त्यहाँ रहेका सबैको खानतलासी गरिए पनि रकम भने भेटिएन ।

सेवाग्राहीहरुले बैंकमा सुरक्षाको प्रवन्ध राम्रो नभएको सीसी क्यामरा पनि नराखिएको भन्दै गुनासो गरेका छन् ।

यस अघि पनि वाणिज्य बैंक बेसीशहर शाखाबाट सेवाग्राहीको रकम पटक पटक हराइसकेको छ ।

युवराज श्रेष्ठ, लमजुङ

प्रतिकृया दिनुहोस