नयाँ संविधानको सुझाव संकलन गर्न खोटाङ सदरमुकाम दिक्तेलमा आयोजित कार्यक्रमका सहभागीहरुले प्रदेशको राजधानी आफ्नो जिल्लामा पारिदिन आग्रह गरेका छन् ।

सुझाव संकलन गर्न गएका क्षेत्र नम्बर एकका सभासद पाँचकर्ण(पीके) राई र सरस्वति बजिमय तथा क्षेत्र नम्बर दुईका सभासद विशाल भट्टराईलाई सहभागीहरुले अव बन्ने प्रदेशको राजधानी खोटाङमा हुनुपर्ने माग राखेका हुन् ।

सहभागी दिलचक्र राईले भने, “प्रदेशको राजधानीका लागि उपयुक्त क्षेत्र दिक्तेल हो ।” उनले नयाँ संविधानमा ५ प्रतिशत थ्रेसहोल्ड हुनुपर्ने, युवा रोजगारलाई संविधानमै लेखिनुपर्ने, युवा परिषद् गठन हुनुपर्ने माग पनि राखे ।

अर्का, सहभागी ओमप्रकाश घिमिरेले सम्पूर्ण शिक्षा राज्यले निशूल्क व्यवस्था गर्नुपर्ने सुझाव दिए । राजनीतिक स्थीरताका लागि चाँडो संविधान आउनुपर्ने बताउँदै सहभागी सुरेन्द्रकुमार राईले भने, “सीमाकंन र नामाकंनसहितको संविधान जारी हुनुपर्छ ।”

खोटाङमा अर्खाैले, चिसापानी र खोटाङबजारमा सुझाव संकलन कार्य ४ साउनमा भएपछि आज सदरमुकाम दिक्तेलबाट सुझाव लिइएको थियो ।

प्रतिकृया दिनुहोस