मध्य तराईमा पर्याप्त वर्षा नहुँदा ४० प्रतिशत मात्रै रोपाइँ भएको छ । रोपाइँको समय घर्किदै गएपछि केही किसानहरुले बोरिङको पानी किनेरै भए पनि रोपाइँ शुरु गरेका छन् ।

आफ्नै बोरिङ नभएका तर, बोरिङबाट सिँचाइ गर्न सकिने स्थानमा खेत भएका किसानहरुले नजिकैको बोरिङबाट पानी किनेर सिँचाइ गरेका हुन् । बोरिङधनीले सुख्खाले पानीको सतह धेरै मुनी पुगेको भन्दै पम्पसेटले तानिएको पानीको मूल्य प्रतिघण्टा तीन सयसम्म लिने गरेका छन् ।

यसरी पानी किनेर खेती गर्दा लागत प्रति कठ्ठामा दुई हजार ५०० रुपैयाँ हुने तर, एक कठ्ठामा उत्पादित धानको मूल्य दुई हजारमात्रै हुने स्थानीय कृषक शिव अधिकारीले बताए ।

अबको एक साता भित्रमा पानी नपरे उत्पादनमा निकै ह्रास आउने कृषि विकास कार्यालय बाराले जनाएको छ ।

आकाशे खेतीमा भर पर्ने खेत भने अझै पनि बाँझै छ ।

कृषि विकास कार्यालयका अनुसार अहिलेसम्म जिल्लामा ४० प्रतिशत खेतमा मात्रै रापाइँ भएको छ । जबकी यतिबेला रोपाइँ ९९ प्रतिशत भइसक्नुपथ्र्यो । रोपाइँ गरिएका खेतमा पनि सुख्खाले धाँजा फाट्न थालेको छ ।

श्याम गुप्ता, बारा

प्रतिकृया दिनुहोस