शब्द/तस्वीर: गोपेन राई
काठमाडौंको डाँछीमा हाते कागज उद्योग सञ्चालन गरिरहेका रेनुमाया थामी (३०) र उनका पति सन्तबहादुर थामी (३२) पहिले यस्तै कागज उद्योगका लागि काम गर्थे ।

दुई वर्षदेखि लोक्ता र बाबियोबाट नेपाली कागज उत्पादन गरिरहेका उनीहरुको स्थायी ठेगाना बिघु, दोलखा हो ।

अनुभव र आफूसँग भएको सबै जोडजाम गर्दा लघु उद्योग खोल्न पुग्ने रकम जम्मा भएपछि उनीहरुले देवढुंगा हाते कागज उद्योग शुरु गरे ।

राम्रो घाम लागेको दिन २५० देखि ३०० ताउ कागज उत्पादन हुने रेनुमाया बताउँछिन् ।

आफ्नो परिवारले मात्रै सञ्चालन गरेको यो सानो उद्योगले घर व्यवहार धान्न तथा सन्तानद्वय ११ वर्षीय मनिष र ९ वर्षीया मनिषालाई पढाउन पुगेको रेनुमायाले बताइन् ।

“सानै भए पनि आफ्नै व्यवसाय गरेका छौं, खानलाउन पुगेकै छ, छोराछोरी पढेकै छन्, सन्तोष छ,” सन्तबहादुरले भने ।

प्रतिकृया दिनुहोस